पिंपरी- चिंचवड : स्मार्ट सिटी असलेल्या पिंपरी- चिंचवड शहरामध्ये अनेक रस्त्यांवर खड्डे पडल्याचं बघायला मिळत आहे. पावसाने महानगरपालिकेच्या प्रशासनाची पोलखोल केली असल्याचं बोललं जात आहे. शहरात २,३०० पेक्षा अधिक खड्डे असल्याची कबुली स्वतः शहर अभियंता मकरंद निकम यांनी दिली आहे. पावसाचे कारण देत तात्पुरते खड्डे बुजवण्याचं काम सुरू असल्याचे देखील त्यांनी सांगितले आहे. पिंपरी- चिंचवड महानगरपालिका आणि सत्ताधाऱ्यांच्या विरोधात राष्ट्रवादी शरद पवार गटाने अनोखं आंदोलन करत रस्त्यावरील खड्ड्यात फुलांचं रोपण केलं. आंदोलनात अजित गव्हाणे यांच्यासह कार्यकर्ते, पदाधिकारी उपस्थित होते. या आंदोलनाच्या माध्यमातून पालिका प्रशासनाचे लक्ष वेधून घेण्याचा प्रयत्न केला. आणखी वाचा-Uddhav Thackeray : “आता शाखांच्या फलकांवरील धनुष्यबाण हटवा अन्…”, उद्धव ठाकरेंचे पदाधिकाऱ्यांना आदेश! स्मार्ट आणि मेट्रो सिटी म्हणून पिंपरी- चिंचवड शहराची ओळख आहे. परंतु, या शहराच्या हद्दीतील काही भागांमध्ये आजही खड्डे दिसत आहेत. मुसळधार पाऊस झाल्याने अनेक ठिकाणी महानगरपालिका प्रशासनाची पोलखोल केली आहे. रस्त्यांवरील डांबर उखडलं आहे. त्याचबरोबर अनेक ठिकाणी खड्डे पडल्याने पाणी साचलं आहे. यामुळे अपघात होण्याची शक्यता आहे. हेच लक्षात घेऊन पिंपरी- चिंचवड शहराच्या राष्ट्रवादी शरद पवार गटाचे अजित गव्हाणे यांनी एक अनोखं आंदोलन केलं. खड्ड्यात फुलांच रोपण करून आंदोलन करत पालिका प्रशासनाला आणि सत्ताधाऱ्यांना इशारा दिला आहे. अनेक वाहन चालकांना पाठीचा त्रास सहन करावा लागत आहे. त्याचबरोबर अपघात होण्याची शक्यता लक्षात घेऊन प्रशासनाने तात्काळ पावलं उचलावीत असं आवाहन अजित गव्हाणे यांनी महानगरपालिकेला केलेलं आहे. शहरातील ८० टक्के खड्डे बुजवले असल्याचं सांगत, ४०० ते ५०० खड्डे लवकरच बजवण्यात येतील असं शहर अभियंता मकरंद निकम यांनी सांगितलं.
