पुणे : शुक्रवारी दिवसभरात जिल्ह्यातील ८५७ जणांना करोना संसर्गाचे निदान झाले आहे. राज्याच्या साथरोग सर्वेक्षण विभागाने याबाबत माहिती दिली. मात्र, बहुसंख्य करोना रुग्णांना सौम्य लक्षणे असून ते घरच्या घरी बरे होत असल्याने घाबरून जाण्याचे कारण नसल्याचे सार्वजनिक आरोग्य विभागाकडून स्पष्ट करण्यात आले आहे.
शुक्रवारी दिवसभरात आढळलेल्या ८५७ नवीन रुग्णांपैकी ५०६ रुग्ण पुणे महापालिका क्षेत्रात आहेत. २१० रुग्ण पिंपरी-चिंचवड महापालिका क्षेत्रात, तर १४१ रुग्ण जिल्ह्याच्या उर्वरित भागात आढळले आहेत. ग्रामीण भागातील दोन रुग्णांना बीए.५ चा संसर्ग असल्याचे स्पष्ट झाले आहे. संसर्गाचा प्रसार रोखण्यासाठी विशेषत: जोखीम गटातील रुग्ण, सहव्याधीग्रस्त आणि ज्येष्ठ नागरिकांनी तसेच लसीकरण न झालेल्या नागरिकांनी मुखपट्टी वापरासह सर्व आवश्यक खबरदारी घेण्याचे आवाहन करण्यात येत आहे. शुक्रवारी आढळलेल्या ८५७ नव्या रुग्णांमुळे पुणे जिल्ह्यातील एकूण करोना रुग्णसंख्या १४ लाख ८२ हजार ७१८ एवढी झाली आहे. पुणे शहर आणि जिल्ह्यात ५१२१ रुग्णांवर उपचार करण्यात येत आहेत.
स्वाईन फ्लू खबरदारी आवश्यक जानेवारी २०२२ ते २१ जुलै २०२२ या काळात पुणे जिल्हा आणि महापालिका क्षेत्रात २३ रुग्णांना स्वाईन फ्लू झाल्याचे समोर आले आहे. दोन रुग्णांचा स्वाईन फ्लूने मृत्यूही झाला आहे. त्यामुळे विषाणूजन्य आजाराचे लक्षण दिसल्यास त्याकडे दुर्लक्ष न करण्याचे आवाहन करण्यात आले आहे.
