पिंपरी : फटाक्यांमुळे दिवाळीच्या कालावधीत घडणाऱ्या आगीच्या घटनांच्या पार्श्वभूमीवर पिंपरी-चिंचवड महापालिकेच्या अग्निशमन विभागामार्फत ‘सुरक्षित दिवाळी’ मोहीम सुरू करण्यात आली आहे. या मोहिमेअंतर्गत आपत्कालीन परिस्थितीसाठी पूर्वतयारी तसेच विशेष जनजागृती मोहीम राबविण्यात येत आहे.
दिवाळी काळात शहरात आगीच्या घटनांची शक्यता लक्षात घेऊन अग्निशमन विभाग सज्ज झाला आहे. महापालिकेच्या सर्व दहा अग्निशमन केंद्रांना सतर्क राहण्याचे, तसेच सर्व कर्मचारी आणि अधिकारी रजा रद्द करून चोवीस तास कार्यरत राहण्याचे निर्देश देण्यात आले आहेत. मुख्य नियंत्रण कक्ष चोवीस तास कार्यरत राहणार आहे. १०१ क्रमांकावर संपर्क केल्यास तातडीने प्रतिसाद देण्यात येत आहे. फटाक्यांच्या स्टॉल परिसरात अग्निशमन वाहनांची गस्त ठेवण्यात आली आहे. फटाके विक्रेत्यांना आणि नागरिकांना लेखी आणि मौखिक सूचना देण्यात आल्या आहेत.
नागरिकांनी वाहनतळ, रस्ते, वसाहती आणि बाजारपेठांमध्ये निष्काळजीपणे फटाके फोडणे टाळावे. फटाके फोडताना किमान दोन मीटरचे अंतर राखावे. फटाक्यांचा साठा घरात, वाहनात किंवा बंद जागेत ठेवू नये. स्वतःची, कुटुंबाची आणि समाजाची सुरक्षा राखावी. आग लागल्यास त्वरित १०१ या अग्निशमन नियंत्रण कक्षाच्या क्रमांकावर संपर्क साधावा. अग्निशमन दलातील सर्व पथकांना अतिरिक्त सतर्कतेच्या सूचना दिल्या आहेत. प्रत्येक अग्निशमन केंद्रात आपत्कालीन वाहने सज्ज ठेवली असल्याचे उप अग्निशमन अधिकारी ऋषिकांत चिपाडे यांनी सांगितले.
शहर जलद गतीने विकसित होत असून, लोकसंख्या वेगाने वाढत आहे. त्यामुळे अग्निसुरक्षेचा विषय प्रत्येकाच्या दैनंदिन आयुष्याशी जोडलेला आहे. ‘सुरक्षित दिवाळी’ ही केवळ मोहीम नसून नागरिकांमध्ये जबाबदार वर्तणुकीची सवय निर्माण करण्याचे पाऊल असल्याचे पिंपरी-चिंचवड महापालिकेचे अतिरिक्त आयुक्त प्रदीप जांभळे-पाटील यांनी सांगितले.
