पिंपरीत मोकळ्या, आरक्षित जागा, उद्यानांमध्ये मनोरंजनास मनाई, काय आहे पालिकेचा निर्णय…

नागरिक, संस्थांमार्फत विविध उत्सव, प्रदर्शनांसाठी महापालिकेच्या मोकळ्या, आरक्षित जागा, मैदाने, उद्याने भाड्याने घेण्यात येतात. या ठिकाणी नागरिक, लहान मुले जास्तीत जास्त संख्येने यावीत, यासाठी तेथे झुले, गोलचक्रे, ट्रॅम्पोलिन, फुग्यांची घरे, विविध राईड्स अशा प्रकारची मनोरंजनांची व खेळांची साधने लावली जातात. सध्या अशा प्रकारे खेळांची साधने लावणे, वीज, शोभेची रोषणाई करण्याचे प्रमाण वाढले आहे. काही ठिकाणी कार्यक्रमाबरोबर विविध यांत्रिक मनोरंजन खेळांची साधने लावली जातात. मात्र, या साधनांच्या सुरक्षिततेबाबत गंभीर प्रश्न उपस्थित झाले असून, विविध समस्या निर्माण होत आहेत.

अनेकदा काही कार्यक्रमांमध्ये मनोरंजनाच्या खेळांची साधने तुटून अपघात घडल्याचेही निदर्शनास आले. अशा अपघातातून जीवितहानी होण्याची शक्यता नाकारता येत नाही. त्यामुळे नागरिकांच्या सुरक्षेचा विचार करून अशा प्रकारे खेळांची साहित्य वापरावर निर्बंध घालणे आवश्यक असल्याचे प्रशासनाने स्पष्ट केले.

कशामुळे मनाई?

झुले, गोलचक्रे, फुग्यांची घरे इत्यादी अनेक उपकरणे अपुरी देखभाल, निकृष्ट दर्जा किंवा अपात्र कर्मचाऱ्यांद्वारे चालवली जातात. यामुळे लहान मुलांना दुखापतींचा धोका, मोकळ्या जागांमध्ये परवानगीशिवाय मनोरंजनाची उपकरणे उभारून तिकीट आकारणी. यांत्रिक मशीन्स, खेळणी उभारताना अपघात होऊ नये यासाठी काळजी घेतली जात नाही. खेळण्याच्या उपकरणांनी व्यापलेल्या जागेमुळे नागरिकांच्या चालण्याच्या, व्यायामाच्या, बसण्याच्या किंवा मैदानी खेळ खेळण्याच्या जागेवर मर्यादा येतात. योग्य स्वच्छतेची व निर्जंतुकीकरणाची व्यवस्था नसल्याने अशा उपकरणांचा वापर केल्याने लहान मुलांना संसर्ग होण्याचा धोका असतो. त्यामुळे मनाई करण्यात आली आहे.

झुले किंवा खेळणी रस्त्यालगत उभारले जातात. यामुळे वाहतुकीस अडथळा निर्माण होतो, अपघाताचा धोका वाढतो. फुग्यांची घरे, ध्वनीवर्धक लावून चालवले जाणारे खेळ, कर्णकर्कश संगीत इत्यादींमुळे आजूबाजूच्या रहिवाशांना त्रास होतो. त्यामुळे सामाजिक तणाव निर्माण होण्याची शक्यता असते, असे महापालिका आयुक्त शेखर सिंह यांनी सांगितले.