खड्डे बुजविण्यासाठी कर्ज द्या! खड्ड्यांकडे लक्ष वेधण्यासाठी अनोखे आंदोलन

पिंपरी-चिंचवड शहरातील अनेक रस्त्यांवर पावसाळा सुरू झाल्यापासून आतापर्यंत दोन हजार ५८२ खड्डे पडले हाेते. यापैकी एक हजार ७१३ खड्डे बुजविले. शहरात केवळ ८०४ खड्डे असल्याचा दावा महापालिका प्रशासनाने केला आहे. असे असले तरी आजही शहरातील विविध भागातील रस्त्यांवर खड्डे दिसून येत आहेत. मुख्य आणि अंतर्गत रस्त्यांवर मोठ्या प्रमाणात खड्डे पडल्याने रस्त्यांची चाळण झाली आहे.

या पार्श्वभूमीवर कामगार ऋषिकेश पाचणकर यांनी भोसरी चौकात उभे राहून रस्त्यांवरील खड्डे बुजविण्यासाठी कर्ज हवे असल्याचा फलक हातात घेवून महापालिकेच्या कारभाराविषयी नाराजी व्यक्त केली.

पाचणकर हे कामाला जाण्यापूर्वी आणि कामावरून घरी जाताना चौका-चौकात थांबून खड्डे बुजविण्यासाठी अनोख्या पद्धतीने महापालिकेकडे पाठपुरावा करताना दिसतात. गेल्या दोन महिन्यांपासून ते पुणे, भोसरी, चाकण, च-हाेली आदी भागांतील रस्त्यावर थांबून जनजागृती करीत आहेत. खड्ड्यांची दुरुस्ती तुम्ही तात्पुरती करता, मग आम्ही कर कायमस्वरूपी का भरायचा, असा सवालही ते फलकाद्वारे प्रशासनाला करीत आहेत. मालमत्ता कर भरूनही खड्डेमय रस्त्यातून प्रवास करावा लागतो. खड्ड्यांमुळे अपघातही होतात. खड्ड्यांची तात्पुरती डागडुजी न करता कायमस्वरूपी खड्डे दुरुस्त करावेत, असे पाचणकर म्हणाले.