Ajit Pawar : “हे तर पठाणी व्याज झालं”, फायनान्स कंपनीच्या अधिकाऱ्याला अजित पवारांनी सुनावलं

पुणे : हडपसर विधानसभा मतदारसंघातील स्व. विठ्ठलराव तुपे नाट्यगृहाची राज्याचे उपमुख्यमंत्री अजित पवार यांनी पाहणी केली. त्यानंतर राष्ट्रवादी काँग्रेस पक्षाच्या नेत्या आणि माजी महापौर वैशाली बनकर यांच्या विशेष प्रयत्नांतून पाच नागरिकांना रिक्षा उपलब्ध करून देण्यात आल्या. त्या रिक्षाचालकांना अजित पवार यांच्या हस्ते रिक्षाचे वाटप करण्यात आले. त्यावेळी एका तरुणाला रिक्षाची चावी देत असताना, त्या तरुणाची तब्येत पाहून अजित पवार म्हणाले की, आरे एवढी तब्येत, बाळा तब्येत कमी कर, एवढ्या कमी वयात एवढी तब्येत योग्य नसल्याचे सांगताच उपस्थितांमध्ये एकच हशा पिकला. त्यानंतर उपस्थित रिक्षाचालकांसोबत त्यांनी संवाद साधला. या दरम्यान फायनान्स कंपनीच्या अधिकाऱ्याला अजित पवारांनी सुनावलं.