दसऱ्यासाठी फूल बाजार बहरला; दर तेजीत, मार्केट यार्डातील बाजार दोन दिवस रात्रीही सुरू

‘दसऱ्याला सर्वाधिक मागणी झेंडू, गुलछडी, शेवंती, अष्टर या फुलांना असते. मार्केट यार्डातील फूलबाजारात मंगळवारपासून झेंडूची मोठ्या प्रमाणावर आवक सुरू झाली. पुणे, सोलापूर, धाराशिव, बीड, हिंगोली परिसरातील शेतकऱ्यांनी मोठ्या प्रमाणावर झेंडू विक्रीस पाठविला. पावसामुळे झेंडूच्या प्रतवारीवर परिणाम झाला. घरगुती ग्राहक आणि व्यापाऱ्यांकडून फुलांची खरेदी बुधवारी केली जाणार आहे. बुधवारी झेंडूची आवक आणखी वाढेल. यंदा झेंडूचे दर तेजीत राहणार असून, सुक्या झेंडूला चांगले दर मिळणार आहेत. किरकोळ बाजारात चांगल्या प्रतीच्या झेंडूचे दर १०० ते १५० रुपयांच्या दरम्यान राहण्याची शक्यता आहे’, अशी माहिती मार्केट यार्डातील फूल व्यापारी सागर भोसले यांनी दिली.

‘फुले खरेदीसाठी मार्केट यार्डातील घाऊक बाजारात बुधवारी सकाळी मोठी गर्दी होईल. पुणे शहर, उपनगरातील ग्राहका, तसेच किरकोळ बाजारातील फूल विक्रेत्यंची खरेदीसाठी गर्दी होईल. झेंडूची बुधवारी आवक आणखी वाढेल. गणेशोत्सव, दसरा, दिवाळीत फुलांना उच्चांकी मागणी असते. दसऱ्याला झेंडूला चांगले दर मिळतात. त्यामुळे शेतकरी झेंडूची फुले राखून ठेवतात’, असे त्यांनी नमूद केले.

घाऊक बाजारातील फुलांचे दर

झेंडू (सुका) – १०० ते १२० रुपये

झेंडू (ओला) – ३० ते ४० रुपये

गुलछडी – ५०० ते ७०० रुपये

शेवंती – १०० ते २५० रुपये

यंदा पावसामुळे झेंडूचे मोठे नुकसान झाले. दसऱ्याला झेंडूला चांगले दर मिळतात. त्यामुळे शेतकरी झेंडू राखून ठेवतात. दसऱ्यापूर्वी झेंंडूची तोड केली जाते. त्यानंतर बाजारात झेंडू विक्रीस पाठविला जातो. गुरुवारपर्यंत फुलबाजाराचे कामकाज अहोरात्र सुरू राहणार आहे. बुधवारी झेंडूची आवक आणखी वाढेल.सागर भोसले. फूल व्यापारी, श्री छत्रपती शिवाजी मार्केट यार्ड