पुणे : आपण वेगवेगळे पदार्थ खाऊन आपल्या जीभेचे चोचले पुरवत असतो. जे आपल्याला आवडते ते देवाला का देऊ नये या भूमिकेतून गणरायाला चक्क आईस्क्रीमचा नैवेद्य रविवारी दाखविण्यात आला. सार्वजनिक गणेशोत्सवाचे यंदा १३३ वे वर्ष आहे. हे औचित्य साधून १३३ लिटर दूध, नॅचरल ऑरेंज पल्प आणि संत्र्याच्या सालींचा क्रश वापरून तयार केलेले १३३ लिटर संत्र्याच्या आईस्क्रीमचा नैवेद्य श्रीमंत दगडूशेठ हलवाई गणपतीला दाखविण्यात आला.
पुण्यातील प्रसिद्ध किगा आईस्क्रीमच्या वतीने रविवारी गणपतीला हा नैवेद्य अर्पण करण्यात आला. त्यानंतर हे आईस्क्रीम प्रसाद म्हणून भाविकांना देण्यात आले. किगा आईस्क्रीमचे संचालक किरण सुरेश साळुंखे आणि गणेश राजेंद्र गोसावी यांच्यासह ट्रस्टचे विश्वस्त, पदाधिकारी आणि कार्यकर्ते या वेळी उपस्थित होते.
हे आईस्क्रीम कसे तयार केले याची माहिती गणेश गोसावी यांनी दिली. ते म्हणाले, ‘साधारण आठ दिवसांमध्ये तापमानाचे प्रमाण साधत संत्र्याच्या आकाराचे म्हणजेच गोलाकार स्वरूपाचे आईस्क्रीम तयार केले. हा आकार बनवत असताना आम्हाला कोल्ड स्टोरेजमध्ये उणे १८ ते २४ तापमानामध्ये थोड्या थोड्या कालावधीमध्ये जाऊन त्याला आकार देणे व तसेच त्याला व्यवस्थितपणे हाताळणे या गोष्टींच्या अडचणी येत होत्या. पण त्यावर मात करून हा छानसा महाप्रसाद आमच्याकडून तयार झाला. हा नैवेद्य गणरायाला अर्पण करण्यात आला, याचा आनंद आहे.’
