पुणे-लोणावळादरम्यान लोकलची म्हशीला धडक; एक तास रेल्वेसेवा विस्कळीत

अपघातात मृत पावलेल्या म्हशीला रेल्वेखालून बाहेर काढल्यानंतर रेल्वेसेवा सुरळीत झाली आहे. या अपघातामुळे लोणावळा- पुणे लोकलसह इतर रेल्वेगाड्यांचं वेळापत्रक कोलमडलं होतं. हा अपघात तळेगाव-देहूरोडच्या दरम्यान घडला. लोणावळा-पुणे लोकल पुण्याच्या दिशेने जात असताना लोहमार्गावर आलेल्या म्हशीला लोकलने धडक दिली. या अपघातानंतर संबंधित म्हैस लोकलखाली अडकली. त्यामुळे लोकलला पुढे जाण्यास अडथळा येत होता.

रेल्वेखाली अडकलेली म्हैस हटवण्यासाठी तब्बल एक तास लागला. त्यांनतर लोकल पुण्याच्या दिशेने रवाना झाली. यामुळे रेल्वे प्रवाशांना मनस्ताप सहन करावा लागला. या अपघातामुळे दोन्ही दिशेनं धावणाऱ्या रेल्वेगाड्या थांबवण्यात आल्या होत्या, असं सांगण्यात येत आहे.