झटपट रोजगारसंधीमुळे नर्सिंग पदवीकडे ओढा, कल कायम राहण्याचे तज्ज्ञांचे निरीक्षण

राज्यात नर्सिंग अभ्यासक्रमांची प्रवेश परीक्षा राज्य सामाइक प्रवेश परीक्षा कक्षातर्फे (सीईटी) घेण्यात येते. त्यातून तीन वर्षे मुदतीच्या जीएनएम, चार वर्षे मुदतीच्या पदवी अभ्यासक्रमाला (बी.एस्सी. नर्सिंग) प्रवेश दिले जातात. सीईटी सेलने दिलेल्या माहितीनुसार, २०२४-२४मध्ये ३१ हजार ३९७ उमेदवारांनी नोंदणी केली होती, तर २७ हजार ९८६ उमेदवारांनी प्रत्यक्ष परीक्षा दिली. २०२४-२५मध्ये अर्जसंख्या आणि परीक्षा देणाऱ्या उमेदवारांची संख्या एकदम दुप्पट झाली. ५८ हजार ६६३ उमेदवारांनी नोंदणी करून ५० हजार २१७ उमेदवार प्रत्यक्ष परीक्षेला उपस्थित राहिले. तर यंदा झालेल्या परीक्षेसाठी ४७ हजार ५०१ उमेदवारांनी नोंदणी केली होती, त्यापैकी ४३ हजार १९१ उमेदवारांनी परीक्षा दिली. त्यामुळे गेल्या वर्षीच्या तुलनेत यंदा उमेदवारांची संख्या काही प्रमाणात घटली असली, तरी या अभ्यासक्रमाला पसंती असल्याचे दिसून येत आहे.

महाराष्ट्र आरोग्य विज्ञान विद्यापीठाचे प्र कुलगुरू डॉ. मिलिंद निकुंभ म्हणाले, राज्यभरात नर्सिंग अभ्यासक्रमाची २७४ महाविद्यालये आहेत. तसेच दरवर्षी महाविद्यालयांची संख्या वाढत आहे. नोकरीच्या संधींमुळे नर्सिंग अभ्यासक्रमाकडे ओढा निर्माण झाला आहे. सुमारे ४० हजार रुपये वेतनाची नोकरी सहज मिळू शकते. त्याशिवाय परदेशात दरवर्षी किमान दहा हजार परिचारिकांची मागणी असते. त्यामुळे अभ्यासक्रमाबरोबरच एखादी परदेशी भाषा शिकणे फायदेशीर ठरते. या अभ्यासक्रमाच्या बहुतांश जागा भरतात. मात्र, फारशा सुविधा नसलेल्या महाविद्यालयातील ५० टक्के जागा भरतात.

नर्सिंग अभ्यासक्रम केलेल्या उमेदवारांना नोकरीच्या संधी चांगल्या प्रमाणात उपलब्ध आहेत. हा अभ्यासक्रम पूर्ण केलेल्या मुलांना, मुलींना सरकारी, खासगी रुग्णालयात नोकरी मिळू शकते, तसेच परदेशातही संधी मिळतात. येत्या काळातही हा कल कायम राहील, असे दिसते. – डॉ. दिलीप म्हैसेकर, माजी वैद्यकीय शिक्षण संचालक