पुणे : खराडी येथील एका हॉटेलमधील खोलीत सुरू असलेल्या पार्टीवर गुन्हे शाखेच्या पथकाने मध्यरात्री छापा घालून केलेल्या कारवाईत अमली पदार्थ, दारू, हुक्का याचे सेवन केले जात असल्याचे उघडकीस आले. पोलिसांनी याप्रकरणी दोन तरुणींसह सात जणांना अटक केली. त्यात ज्येष्ठ नेते एकनाथ खडसे यांच्या जावयाचाही समावेश आहे. अटक आरोपींना न्यायालयाने दोन दिवसांची पोलीस कोठडी सुनावली. .
‘‘डॉ. प्रांजल मनीष खेवलकर, निखिल जेठानंद पोपटाणी, समीर फकीर महमंद सय्यद. सचिन सोमाजी भोंबे, श्रीपाद मोहन यादव, इशा देवज्योत सिंग, प्राची गोपाल शर्मा यांना या प्रकरणी अटक करण्यात आली. त्यांच्याकडून २ ग्रॅम ७० मिलीग्रॅम कोकेन, ७० ग्रॅम गांजा सदृश्य पदार्थ, हुक्का पात्र, दहा मोबाइल संच, सुगंधी तंबाखू, दोन मोटारी, मद्याच्या बाटल्या असा मुद्देमाल जप्त करण्यात आला,’’ अशी माहिती गुन्हे शाखेचे पोलीस उपायुक्त निखिल पिंगळे यांनी पत्रकार परिषदेत दिली. खराडी परिसरात शनिवारी रात्री गुन्हे शाखेचे पथक गस्त घालत होते. त्या वेळी स्टे बर्ड अझुर हॉटेलमधील एका खोलीत पार्टी सुरू असून, पार्टीत अमली पदार्थांचा वापर केला जाणार असल्याची माहिती तपास पथकाला मिळाली. त्यानंतर रविवारी पहाटे अडीचच्या सुमारास पोलिसांच्या पथकाने तेथे छापा टाकला. या प्रकरणात अटक करण्यात आलेल्या आरोपींविरुद्ध अमली पदार्थ प्रतिबंधक कायद्यान्वये (एनडीपीएस) खराडी पोलीस ठाण्यात गुन्हा दाखल करण्यात आला आहे, असे पिंगळे यांनी नमूद केले.
‘पार्टी कल्चर’मधून आरोपींची ओळख?
आरोपींची एकमेकांशी ओळख पुण्यातील ‘पार्टी कल्चर’मधून झाल्याचा प्राथमिक अंदाज आहे. त्यानंतर ते एकमेकांच्या संपर्कात आले. पोपटाणी हा सिगारेट वितरक आहे. सय्यद याचा हार्डवेअर व्यवसाय आहे. यादव हा बांधकाम व्यावसायिक आहे. आरोपींनी यापूर्वी अशा प्रकारच्या पार्टीचे किती वेळा आयोजन केले, तसेच एकमेकांच्या नियमित संपर्कात होते का, या दृष्टीने तपास करण्यात येत असल्याची माहिती पोलिसांनी दिली. डॉ. खेवलकर यांच्या बंगल्यावर पोलिसांनी छापा टाकला असून, तेथून लॅपटॉप आणि हार्ड डिस्क जप्त करण्यात आली.
खराडीतील पार्टी प्रकरणात पोलिसांनी जप्त केलेले अमली पदार्थ न्यायवैद्याकीय प्रयोगशाळेत तपासणीसाठी पाठविण्यात आले आहेत. या प्रकरणाचा सखोल तपास करण्यात येत आहे. न्यायवैद्याकीय प्रयोगळशाळेचा अहवाल मिळालेला नाही. अमली पदार्थ कोणी पुरविले, या दृष्टीने तपास करण्यात येत आहे. – निखिल पिंगळे, पोलीस उपायुक्त, गुन्हे शाखा
राजकीय वर्तुळात चर्चा
खराडीतील पार्टी प्रकरणात अटक करण्यात आलेले डॉ. प्रांजल खेवलकर हे ज्येष्ठ नेते एकनाथ खडसे यांची कन्या आणि राष्ट्रवादी काँग्रेस (शरद पवार) पक्षाच्या महिला प्रदेशाध्यक्ष रोहिणी खडसे यांचे पती आहेत. खडसे यांच्या जावयाला अटक करण्यात आल्यानंतर राजकीय वर्तुळात खळबळ उडाली.
