धक्कादायक! महिलेचा खून करून कचरापेटीत मृतदेह टाकला, येरवड्यातील दोघांविरुद्ध गुन्हा

सुवर्णा (वय ४०) असे खून झालेल्या महिलेचे नाव आहे. सुवर्णा फिरस्ती असून, तिचे पूर्ण नाव समजले नाही. याप्रकरणी रवी रमेश साबळे (वय ३५), त्याचे वडील रमेश रामचंद्र साबळे (वय ६५, रा. जिजामातानगर, नवी खडकी, येरवडा) यांच्याविरुद्ध गुन्हा दाखल करण्यात आला आहे. सहायक पोलीस निरीक्षक संतोष शिंदे यांनी येरवडा पोलीस ठाण्यात फिर्याद दिली आहे. आरोपी रवी साबळे याची सुवर्णा नावाच्या महिलेशी काही दिवसांपूर्वी पुणे स्टेशन परिससरात ओळख झाली होती. १५ नाेव्हेंबर रोजी तिला पुणे स्टेशन परिसरातून त्याने येरवड्यातील घरी आणले. किरकोळ कारणावरुन रवीचा तिच्याशी वाद झाला. त्यानंतर रवी आणि त्याचे वडील रमेश यांनी तिला घरात लाकडी दांडक्याने बेदम मारहाण केली. मारहाणीत ती गंभीर जखमी झाला. गंभीर जखमी झालेल्या सुवर्णाला दोघांनी रुग्णालयात उपचारसाठी दाखल केले नाही. तिचा मृत्यू झाल्याचे समजल्यानंतर दोघांनी दोन ते तीन दिवस मृतदेह घरात ठेवला.

मृतदेह दोन दिवस घरात ठेवल्यानंतर दुर्गंधी सुटली. आरोपींनी तिचा मृतदेहाची विल्हेवाट लावून पुरावा नष्ट करण्याचा प्रयत्न केला. तिचा मृतदेह चादरीत गुंडाळून रिक्षातून लोहगाव-वाघोली रस्त्यावरील स्मशानभूमी परिसरात नेला. त्यानंतर या भागातील मोकळ्या जागेतील कचरापेटीत तिचा मृतदेह आरोपींनी टाकला. मंगळवारी (१८ नाेव्हेंबर) लोहगाव-वाघोली रस्त्यावर एका महिलेचा मृतदेह सापडल्याची माहिती पोलिसांना मिळाली. परिमंडळ चारचे पोलीस उपायुक्त सोमय मुंढे, सहायक आयुक्त प्रांजली सोनवणे, येरवडा पोलीस ठाण्याचे वरिष्ठ पोलीस निरीक्षक अंजुम बागवान यांनी घटनास्थळी भेट दिली.

पोलिसांनी तपास सुरू केला. तपासात मिळालेल्या माहितीनुसार, आरोपी रवी साबळे आणि त्याचे वडील रमेश यांनी सुवर्णाचा किरकोळ वादातनू बेदम मारहाण करुन खून केल्याची माहिती मिळाली. पुरावा नष्ट करण्यासाठी तिचा मृतदेह कचरापेटीत फेकून दिल्याचे उघडकीस आले. पसार झालेल्या आरोपींना ताब्यात घेण्यात आले असून, गुन्हे शाखेचे पोलीस निरीक्षक विजय ठाकर तपास करत आहेत.