पुणे : पीएमपीएमएल प्रवासी महिलांकडील दागिने चोरीला जाण्याच्या घटनांमध्ये वाढ झाली आहे. महापालिका भवन परिसरात सोमवारी पीएमपीएमएल प्रवासी महिलेच्या हातातील बांगडी कटरने तोडून पसार झालेल्या चोरट्याला पीएमपीएमएल वाहकाने पाठलाग करुन पकडले. वाहकाच्या तत्परतेमुळे चोरटा गजाआड झाल्याने प्रवाशांनी कौतुक केले.
लखन सुहास जाधव (वय ३०, रा. सर्वोदय कॉलनी, मुंढवा) असे अटक केलेल्या चोरट्याचे नाव आहे. या प्रकरणी त्याच्याबरोबर असलेला साथीदार चाँद शेख (रा़ मुंढवा) याच्याविरुद्ध गुन्हा दाखल करण्यात आला आहे. शेख पसार झाला असून, पोलिसांकडून त्याचा शोध घेण्यात येत आहे. याबाबत रेणू हाडु साहु (वय ५६, रा. आनंदनगर, सणसवाडी ता. शिरुर, जि. पुणे) यांनी शिवाजीनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, साहू या सोमवारी सायंकाळी सणसवाडी येथून पीएमपी बसने प्रवास करत होत्या. महापालिका भवन परिसरातील थांब्यावर बस थांबली. त्यावेळी साहू बसमधून उतरत होत्या. त्यावेळी चोरटे जाधव आणि साथीदार शेख यांनी महिलेकडे मदतीचा बहाणा केला. महिलेकडील पिशवी धरून तिला उतरण्यास मदत करण्याचा बहाणा केला. त्यावेळी चोरट्यांनी त्यांची पिशवी घट्ट धरून ठेवली. पीएमपीएमएल वाहकाने महिलेला बसमधून उतरण्यास सांगितले.
तेव्हा माझी पिशवी दोघांनी घट्ट धरून ठेवली आहे, असे साहू यांनी वाहकाला सांगितले. त्यानंतर चोरटे पीएमपीएमएल बसमधून उडी मारुन पसार झाले. हातातील बांगडी चोरल्याचे लक्षात आल्यानंतर साहू यांनी आरडाओरडा केला. पीएमपीएमएल वाहकाच्या लक्षात हा प्रकार आला. त्यानंतर वाहकाने पाठलाग करून चोरटा जाधव याला पकडले. त्याच्याबरोबर असलेला साथीदार शेख पसार झाला. या घटनेची माहिती प्रवाशांनी पोलिसांना दिली. पीएमपीएमएल वाहकाने चोरटा जाधव याला पकडून पोलिसांच्या ताब्यात दिले. सहायक पोलीस निरीक्षक दीपक रोमाडे तपास करत आहेत.
गेल्या वर्षभरपासून पीएमपीएमएल प्रवासी महिलांकडील दागिने लांबविण्याच्या घटनांमध्ये वाढ झाली आहे. चोरटे गर्दीच्या मार्गावरील पीएमपीएमएल बसमध्ये प्रवेश करुन महिलांकडील दागिने लांबवितात. गर्दीत चोरटे कटरचा वापर करुन महिलांच्या हातातील बांगड्या लांबवितात.
