पिंपरी : चिखली परिसरातील एका सराफी पेढीवर दरोडा टाकण्यासाठी अलिशान मोटारीतून आलेल्या रावण टोळीचा डाव पिंपरी-चिंचवड गुन्हे शाखेच्या गुंडा विरोधी पथकाने उधळून लावला. टोळीतील सहा जणांना अटक केली असून, तीन अल्पवयीन मुलांना पोलिसांनी पिस्तूल, कोयता अशा घातक शस्त्रांसह ताब्यात घेतले आहे.
अनिरुद्ध उर्फ बाळ्या उर्फ विकी राजू जाधव (वय २८, रा. रावेत), अभिषेक उर्फ बकासूर चिमाजी पवार ( वय २२, रा. चिंचवड), यश उर्फ गोंद्या आकाश खंडागळे ( वय २१, रा. निगडी), शुभम गोरखनाथ चव्हाण ( वय ३०, रा. आकुर्डी), प्रद्युम्न राजकुमार जवळगे ( वय २५, रा. चाकण) आणि सोहन राजू चंदेलिया (वय २३, रा. रावेत) अशी अटक केलेल्या आरोपींची नावे आहेत.
पोलीस उपायुक्त डॉ. शिवाजी पवार यांनी दिलेल्या माहितीनुसार, चिखली परिसरातील एका सराफी पेढीवर सशस्त्र दरोडा घालण्याच्या तयारीने आरोपी आले होते. अलिशान मोटारीतून आरोपी दरोडा टाकण्यासाठी आले असल्याची माहिती गुंडा विरोधी पथकाला मिळाली. त्यानुसार पोलिसांनी सापळा लावला. दोघेजण मोटारीच्या बाहेर थांबून पाहणी करत होते. सातजण मोटारीमध्ये बसून होते. पोलिसांनी त्यांना ताब्यात घेऊन त्यांच्याकडून दोन मोटारी, पिस्तूल, जिवंत काडतूस, कोयता, गुप्ती, मिरची पूड, बांबू, रस्सी असा एकूण १५ लाख २५ हजार ९७४ रुपये किमतीचा मुद्देमाल जप्त केला.
अनिरुद्ध याच्यावर पोलिसांनी मकोकाची कारवाई केली आहे. त्या गुन्ह्यात तो फरार होता. त्याच्या विरोधात निगडी, देहूरोड, वाकड, चिंचवड, जळगाव चोपडा, ठाण्यातील उत्तमनगर पोलीस ठाण्यामध्ये खुनासाठी अपहरण, दरोडा, खुनाचा प्रयत्न, शस्त्र बाळगणे असे दहा गंभीर गुन्हे दाखल आहेत. यश याच्या विरोधात निगडी पोलीस ठाण्यात दोन गंभीर गुन्हे दाखल आहेत. त्यातील एका गुन्ह्यात तो फरार होता. सोहनच्या विरोधात तडीपारीची कारवाई करण्यात आली आहे.
