सावित्रीबाई फुले पुणे विद्यापीठाच्या प्र- कुलगुरू निवडीवर कुलगुरूंनी दिले स्पष्टीकरण…

विद्यापीठ कायद्यातील तरतुदीनुसार सर्व नियमांचा अभ्यास करूनच प्र- कुलगुरूपदी डॉ. पराग काळकर यांची नुकत्याच झालेल्या व्यवस्थापन परिषदेच्या बैठकीत निवड करण्यात आली. कुलगुरू आणि प्र- कुलगुरू यांच्यात एकवाक्यता असावी, हा विद्यापीठ कायद्यातील तिसऱ्या सुधारणेमागचा मूळ उद्देश होता. कायद्यातील तरतुदीनुसार प्र- कुलगुरू निवडीचा निर्णय व्यवस्थापन परिषदेच्या संमतीनेच घेण्यात आला. प्र- कुलगुरू पदासाठी प्राप्त झालेल्या अर्जांमधून योग्य उमेदवार निवडण्याचा प्रामाणिक प्रयत्न केला. सर्व कायदेशीर बाबी तपासूनच डॉ. काळकर यांची निवड करण्यात आल्याचे डॉ़ गोसावी यांनी नमूद केले.

हेही वाचा : पुणे: रक्षाबंधनानिमित्त पीएमपीकडून जादा गाड्यांचे नियोजन

प्र- कुलगुरू पदासाठी विद्यापीठाच्या विविध अधिकार मंडळावर काम केलेली, संलग्नित महाविद्यालयात कामाचा प्रदीर्घ अनुभव, वेगळ्या विद्याशाखा आणि विषयातील व्यक्ती असावी, तसेच कुलगुरू आणि प्र- कुलगुरू पदावरील दोन्ही व्यक्ती विद्यापीठाच्या आवारातील नसावी, हा विचार होता. सामाजिक बांधिलकीचा विचार करूनच निवड करण्यात आली, असेही त्यांनी स्पष्ट केले. आगामी काळात क्रमवारीमध्ये विद्यापीठाचे स्थान उंचावणे, नॅक मूल्यांकनात विद्यापीठाला पुढे जाण्यासाठी प्र- कुलगुरू यांची निवड लवकर करणे गरजेचे होते. या पूर्वी नियुक्त झालेल्या प्र- कुलगुरूंमध्ये बहुतांश जण संलग्न महाविद्यालयांचे प्राचार्य होते. विद्यापीठाला पुढे घेऊन जाण्यासाठी संलग्न महाविद्यालयाचे प्रतिनिधी प्र- कुलगुरू असणे सोयीचे होईल. हा विचार करून काळकर यांच्या नियुक्तीचा निर्णय व्यवस्थापन परिषदेच्या बैठकीत करण्यात आल्याचे डॉ. गोसावी यांनी सांगितले.