पुणे : वर्षाविहारासाठी पर्यटन महामंडळाकडून पुणे विभागात खास सवलती

गेल्या काही दिवसांपासून जिल्ह्यातील घाटमाथ्यावर कोसळणारा पाऊस सध्या ओसरला आहे. पावसाने थोडी उसंत घेतल्यामुळे पर्यटकांची पावले पर्यटनाकडे वळत आहेत. या पर्यटकांना पर्यटन महामंडळाची निसर्गरम्य ठिकाणे साद घालीत आहेत. पुणे विभागातील महाबळेश्वर, लोणावळा (कार्ला), माळशेज घाट, माथेरान, पानशेत, सिंहगड, कोयना या ठिकाणी पर्यटकांची खास पसंती मिळत आहे.

याबाबत पर्यटन महामंडळाच्या पुणे विभागाचे प्रादेशिक व्यवस्थापक दीपक हरणे म्हणाले, ‘वाढत्या शहरीकरणामुळे प्रत्यक्ष शहरात राहणाऱ्या लोकांना त्याच त्या गर्दीचा, मॉल संस्कृतीचा, वाहतुक कोंडीचा, संगणकीय मनोरंजनाचा आणि एकंदरीत धकाधकीचा नागरी जीवनमानाचा कंटाळा आला आहे. अशावेळी शहरापासुन दुर निसर्गरम्य ठिकाणी मनमुराद पावसाचा आणि दाट धुक्याचा अनुभव घेण्यास पर्यटक आसुसलेले आहेत. वर्षा पर्यटनाचा आनंद घेण्यासाठी उत्साही पर्यटकांची रेलचेल सुरू झाली आहे. मात्र, वर्षा पर्यटन करताना धोकादायक ठिकाणांपासुन सावध राहणे, शासनाच्या मार्गदर्शक तत्त्वाचे पालन करणे आवश्यक आहे. जीव धोक्यात घालुन सेल्फी काढणे, निसरडया धबधब्यांच्या ठिकाणी जाणे, अनोळखी जंगलातुन भ्रमंती करणे सर्वतोपरी टाळावे यासाठी महामंडळ आग्रही असुन त्याबाबतच्या मार्गदर्शक सुचना महामंडळांच्या पर्यटक निवासांच्या ठिकाणी पर्यटकांना दिल्या जात आहेत.’

दरम्यान, पर्यटक निवासांच्या ठिकाणी प्री-वेडींग फोटोशुट, डेस्टिनेशन वेडींग, कंपन्यांच्या कॉन्फरन्स यासाठी महामंडळाकडुन सोय करण्यात आली आहे. कर्मचाऱ्यांवरील ताण कमी करण्यासाठी अशा निसर्गरम्य वारसा स्थळांच्या ठिकाणी कॉन्फरन्स घेण्यासाठी वेगवेगळया कंपन्या नियोजन करीत असुन अशा कंपन्यासाठी महामंडळ एकत्रित खोली आरक्षित करण्यावर सवलत देत आहे. सध्याचे वातावरण पाहता पर्यटकांच्या सुरक्षेस सर्वोच्च प्राधान्य देताना शासनाने दिलेल्या मार्गदर्शक सुचनांचे काटेकोरपणे पालन महामंडळाच्या पर्यटक निवासात करण्यात येत असुन पर्यटकांनाही धोकादायक ठिकाणी वर्षापर्यटनास न जाण्यासाठी सुचना देण्यात येत आहेत. पर्यटक निवासाच्या आरक्षणासाठी आणि अधिक माहितीसाठी महामंडळाच्या http://www.mtdc.co या संकेतस्थळावर संपर्क साधावा, असे आवाहन हरणे यांनी केले आहे.

ज्येष्ठ नागरिक, शासकीय कर्मचाऱ्यांना खास सवलती

ज्येष्ठ नागरिक, शासकीय कर्मचारी यांना आगाऊ आरक्षणासाठी सवलती देण्‍यात येत आहेत. सामाजिक बांधिलकी जपताना आजी – माजी सैनिक आणि शारीरिक विकलांग नागरिकांसाठी खास सवलती दिल्या आहेत. समूह आरक्षणासाठी १५-२० खोल्यांपेक्षा जास्त आरक्षण केल्यास सवलत देण्यात येत आहेत. शालेय सहलींसाठी खास सवलती देण्यात येत आहेत. तसेच काहीर् नावीन्यपूर्ण निर्णय घेताना महामंडळानेही पर्यटकांचा आनंद द्विगुणीत करण्यासाठी मोफत न्याहारीची सुरूवात केली आहे, असेही हरणे यांनी सांगितले.