कसबा विधानसभा मतदारसंघातील पोटनिवडणुकीचे मतदान रविवारी (२६ फेब्रुवारी) होणार आहे. मतदान प्रक्रिया शांततेत पार पाडण्यासाठी पोलिसांनी बंदोबस्ताची आखणी केली असून मतदानाच्या दिवशी कडक बंदोबस्त तैनात करण्यात येणार आहे. पोटनिवडणुकीत नऊ मतदान केंद्र संवेदनशील असून तेथे अतिरिक्त बंदोबस्त ठेवण्यात येणार आहे.
हेही वाचा >>>कसबा पोटनिवडणूकीत चर्चेत असलेल्या ‘पुण्येश्वर मंदिर’चा नेमका इतिहास काय आहे?
कसबा विधानसभा मतदार संघातील पोटनिवडणुकीकडे संपूर्ण राज्याचे लक्ष लागले आहे. मतदान प्रक्रिया शांततेत पार पाडण्यासाठी, अनुचित घटना टाळण्यासाठी पोलिसांनी बंदोबस्ताची आखणी केली आहे. शनिवारपासून (२५ फेब्रुवारी) कसबा मतदार संघातील वेगवेगळ्या भागात कडक बंदोबस्त ठेवण्यात येणार आहे. पोलीस आयुक्त रितेश कुमार, सहपाेलीस आयुक्त संदीप कर्णिक यांच्या मार्गदर्शनाखाली बंदोबस्ताची आखणी करण्यात आली आहे.
मतदानाच्या दिवशी कसबा मतदारसंघात १७०० पोलिसांचा बंदोबस्त तैनात असणार आहे. शहर पोलिस दलातील एक हजार पोलिस अधिकारी आणि कर्मचारी तसेच केंद्रीय राखीव पोलिस दलातील (सीआरपीएफ) ५०० जवान आणि राज्य राखीव पोलिस दलातील शंभर पोलिस कर्मचारी बंदोबस्तात सहभागी होणार आहेत. मतदानादरम्यान कोणताही अनुचित प्रकार घडू नये, यासाठी शीघ्र कृती दलाच्या तुकड्या तैनात राहणार आहेत, अशी माहिती पोलीस आयुक्त रितेश कुमार यांनी पत्रकार परिषदेत दिली. विशेष शाखेचे पोलीस उपायुक्त आर. राजा या वेळी उपस्थित होते.
समर्थ, फरासखाना, विश्रामबाग, खडक, दत्तवाडी या पोलिस ठाण्यांच्या हद्दीत पोटनिवडणूक होत आहे. एकूण ७६ मतदान केंद्रांवरील २७० बूथवर मतदान होणार आहे. मतदान केंद्रांपासून शंभर मीटर अंतरातील सर्व दुकाने, उपाहारगृहे, खाद्यपदार्थ गाड्या, टपऱ्या बंद ठेवण्याचे आदेश देण्यात आले आहे, असे त्यांनी सांगितले.
२७८९ सराईत गुन्हेगारांवर प्रतिबंधात्मक कारवाई
कसबा पोटनिवडणुकीसाठी पोलिसांनी ठिकठिकाणी तपासणी नाके सुरू केले होते. नाकाबंदी दरम्यान पोलिसांनी ३२ लाख १८ हजार ५०० रुपये जप्त केले होते. संबंधित रोकड निवडणूक अधिकाऱ्यांकडे देण्यात आली आहे. पोलिसांनी ३३ हजार ७८५ रुपयांचा मद्यसाठा जप्त केला. पोटनिवडणुकीच्या पार्श्वभूमीवर पोलिसांनी दोन हजार ७८९ सराइतांवर प्रतिबंधात्मक कारवाई केली आहे. बेकायदा शस्त्र बाळगणाऱ्यांवर कारवाई केली असून त्यांच्याकडून ११९ शस्त्रे जप्त करण्यात आली.
