पुणे : सदनिकेचे कुलूप तोडून चोरट्यांनी एक लाख ३८ हजार रुपयांचे सोन्याचे दागिने लांबविल्याची घटना हडपसर भागातील एका सोसायटीत घडली. याबाबत एकाने हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार हे हडपसरमधील गोपाळपट्टी परिसरातील जय मल्हार सोसायटीत राहायला आहेत. १३ जून रोजी तक्रारदार आणि कुटुंबीय हे बाहेरगावी गेले होते. ते दोन दिवसांनी गावाहून परतले. तेव्हा सदनिकेचे कुलूप तोडून चोरट्यांनी कपाटातून एक लाख ३८ हजारांचे सोन्याचे दागिने चोरून नेल्याचा प्रकार उघडकीस आला. सहायक पोलीस निरीक्षक जाधव तपास करत आहेत. हडपसर भागातील वैभव चित्रपटगृह परिसरातील एका सदनिकेतून ३९ लाखांचे दागिने लांबविण्यात आल्याची घटना नुकतीच घडली होती.
घरकाम करणाऱ्या महिलेकडून ऐवज लंपास
घरकाम करणाऱ्या महिलेने एक लाख १५ हजारांचे सोन्याचे दागिने लांबविल्याची घटना बिबवेवाडी भागात घडली. याबाबत एका महिलेने भारती विद्यापीठ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिलेच्या घरी कामासाठी एक महिला यायची. महिलेचे लक्ष नसल्याची संधी साधून कपाटातून एक लाख १५ हजारांचे दागिने चोरून नेण्यात आल्याचा प्रकार नुकताच उघडकीस आला. घरकाम करणारी महिला ऐवज चोरून पसार झाल्यानंतर ती कामावर आली नाही. त्यामुळे तक्रारदार महिलेचा संशय बळावला. त्यांनी तिच्या मोबाइल क्रमांकावर संपर्क साधला. तेव्हा मोबाइल क्रमांक बंद असल्याचे लक्षात आले. पोलीस उपनिरीक्षक स्वप्नील पाटील तपास करत आहेत.
