लोकसत्ता प्रतिनिधी
पिंपरी : लम्पीचा वाढता प्रादुर्भाव रोखण्यासाठी महापालिकेने तीन पथके नेमली आहेत. लसीकरण, उपचार, पशुपालकांमध्ये जनजागृती आणि मार्गदर्शक सूचनांची कडक अंमलबजावणी करण्यावर भर देण्यासाठी या पथकांमार्फत कार्यवाही केली जाणार आहे.
पिंपरी-चिंचवड महापालिका कार्यक्षेत्रात लम्पी त्वचा आजाराचा प्रसार होत असल्याचे दिसून येत आहे. बाधित जनावरांची संख्या रोखण्यासाठी पशुवैद्यकीय विभागाने तीन पथकांची नेमणूक केली आहे. प्रत्येक पथकामध्ये वैद्यकीय अधिकारी, मदतनीस आणि एक पशुधन पर्यवेक्षक असणार आहेत. राज्य पशुसंवर्धन विभागाकडून ‘गोटपॉक्स’ लसीचे एक हजार डोस उपलब्ध करून घेतले आहेत. आणखी डोस देण्याची मागणी केली आहे.
आणखी वाचा-प्रवाशांसाठी खुशखबर! रेल्वे स्थानकावरच करा आता इलेक्ट्रिक वाहन चार्ज
लसीकरण प्रक्रिया जलद गतीने सुरु असून, ५०० जनावरांचे लसीकरण पूर्ण करण्यात आले आहे. भटक्या गुरांमध्ये लम्पी संसर्गाचा प्रसार रोखण्यासाठी विलगीकरण कक्षांची स्थापना करण्यात येणार आहे. खासगी पशुवैद्यकीय डॉक्टरांना लम्पी आजाराबाबत त्वरित अहवाल सादर करण्याचे निर्देश दिले आहेत. अहवाल सादर झाल्यानंतर वेळेत उपचार सुरु करण्यात येतील, असे पशुवैद्यकीय विभागाकडून सांगण्यात आले.
शहरात ६१ जनावरांना लम्पीची लागण झाली होती. त्यापैकी तीन जनावरे दगावले आहेत. गोठ्यांची फवारणी केली जात आहे. भोसरी परिसरात लम्पीची लागण होणाऱ्या जनावारांचे प्रमाण जास्त आहे. लम्पीची साथ नियंत्रणात येत आहे. -संदीप खोत, उपायुक्त पशुवैद्यकीय विभाग, पिंपरी-चिंचवड महापालिका
