पुणे : केरळमधील श्री पद्मनाभ स्वामी मंदिराचे विश्वस्त आणि त्रावणकोर राजघराण्याचे युवराज आदित्य वर्मा यांनी रविवारी श्रीमंत दगडूशेठ गणपतीचे दर्शन घेत महामंगल आरती केली. त्यांनी गणरायाला अभिषेक केला. वेदमूर्ती नटराज शास्त्री यांनी अभिषेकाचे पौरोहित्य केले.
श्रीमंत दगडूशेठ हलवाई सार्वजनिक गणपती ट्रस्टच्या वतीने युवराज आदित्य वर्मा यांचा यशोचित सन्मान करण्यात आला. सन्मानचिन्ह आणि यंदाच्या गणेशोत्सवात ट्रस्टतर्फे साकारण्यात आलेल्या श्री पद्मनाभ स्वामी मंदिर प्रतिकृतीचे भव्य छायाचित्र त्यांना देण्यात आले. ट्रस्टचे अध्यक्ष सुनील रासने, कोषाध्यक्ष महेश सूर्यवंशी, सिद्धार्थ गोडसे, अजय मोझर यांच्यासह पदाधिकारी आणि कार्यकर्ते उपस्थित होते. ट्रस्टच्या सर्व उपक्रमांची माहिती त्यांनी या वेळी घेतली.
युवराज आदित्य वर्मा म्हणाले, ‘श्रीमंत दगडूशेठ हलवाई गणपतीने स्वतःच मला येथे आमच्या कुटुंबासाठी, आमच्या लोकांसाठी आणि सर्वांसाठी आशीर्वाद घेण्यासाठी बोलावले आहे. जेव्हा मी येथे आलो, तेव्हा मला श्री पद्मनाभ स्वामी मंदिराची यंदाच्या गणेशोत्सवात केलेली प्रतिकृती पाहायला मिळाली. मला खूप आश्चर्य वाटले आणि ती खूप नीटनेटकेपणाने तयार केलेली होती. या सुंदर उपक्रमासाठी मी मनापासून कौतुक करतो. ट्रस्टचे सर्व विश्वस्त आणि काम करणाऱ्या लोकांचे आभार मानतो आणि महागणपती विघ्नहर्ता सर्व लोकांचे रक्षण करो, अशी प्रार्थना करतो.
श्रीमंत दगडूशेठ हलवाई गणपती ट्रस्टतर्फे यंदाच्या गणेशोत्सवात पद्मनाभ स्वामी मंदिराची प्रतिकृती साकारण्यात आली होती. गणेशोत्सवात आदित्य वर्मा यांना आमंत्रित केले होते, परंतु, ते येऊ शकले नाहीत. मात्र, उत्सवानंतर, ते गणपती मंदिरात आले. अभिषेक आणि महामंगल आरती केली. ट्रस्टच्या वतीने पारंपरिक ढोल ताशा आणि केरळी वाद्य चेंदा मेलमच्या सुरेल वाद्यवादनात त्यांचे स्वागत करण्यात आले. महेश सूर्यवंशी, कोषाध्यक्ष, श्रीमंत दगडूशेठ हलवाई गणपती ट्रस्ट
