पुणे : विमानतळावर प्रवाशांना मिळणाऱ्या आलिशान आणि आरामदायी सुविधा रेल्वे स्थानकावर मिळणार आहेत. याची सुरुवात पुण्यातून झाली आहे. पुणे रेल्वे स्थानकावर प्रवाशांसाठी आरामदायी मसाज खुर्च्या उपलब्ध करून दिल्या आहेत. यामुळे प्रवासांना दमलेल्या प्रवाशांना आराम मिळणार आहे.
रेल्वे विभागाकडून प्रवाशांना विविध सुविधा दिल्या जात आहेत. आता पुणे रेल्वे स्थानकावर विमानतळ, मॉलमध्ये देण्यात येणाऱ्या सुविधा उपलब्ध करून देण्यात येत आहेत. पुणे रेल्वे विभागाचे वरिष्ठ विभागीय वाणिज्य व्यवस्थापक डॉ. मिलिंद हिरवे यांच्या उपस्थितीत पुणे स्थानकावर आराम क्षेत्र किऑस्क सुविधेचे उद्घाटन करण्यात आले. प्रवाशांना फलाटावर बॉडी मसाजचा आनंद घेता यावा यासाठी किऑस्कमध्ये तीन रोबोटिक मसाज खुर्च्या आहेत. हे किओस्क प्लॅटफॉर्म क्रमांक एक वर स्थित आहे.
प्रवासी १२ ते ४८ तासांच्या प्रवासानंतर थकतात. कोणत्याही कारणास्तव गाडीला विलंब झाल्यास प्रवासात त्रास होतो आणि थकवा आल्याने कामावर परिणाम होतो. घरी पोहोचूनही अनेक जणांना थकवा जाणवतो. अशा परिस्थितीत स्थानकावर असलेले मसाज चेअर किऑस्क प्रवाशांसाठी उपयुक्त ठरणार आहे. मसाज खुर्चीच्या फायद्यांमध्ये रक्त प्रवाह सुधारणे, स्नायूंचा ताण कमी होणे, पाठ आणि मानेच्या दुखण्यापासून आराम, शारीरिक आकार सुधारणे आणि झोपेची गुणवत्ता सुधारणे यांचा समावेश होतो.
रेल्वे स्थानकावर विमानतळासारख्या सुविधा देण्यासाठी पुणे विभाग प्रयत्नशील आहे. या अनुषंगाने स्थानकात आराम क्षेत्र सुरू करण्यात आले असून प्रवाशांच्या वापरासाठी आधुनिक मसाज खुर्च्या उपलब्ध करून देण्यात आल्या आहेत. ही सुविधा २४ तास उपलब्ध राहणार आहे.” – डॉ. रामदास भिसे, जनसंपर्क अधिकारी, पुणे विभाग, मध्य रेल्वे
