पुणे : केंद्र सरकारने देशभरात ‘वंदे भारत एक्स्प्रेस’ रेल्वे गाडय़ा सुरू करण्याचा सपाटा लावला आहे. ही अत्याधुनिक वेगवान गाडी असल्यामुळे प्रवाशांमध्येही तिच्याबद्दल कुतूहल आहे. आता ती आणखी वेगळय़ा रूपात आणि भगव्या रंगात दाखल झाली आहे. अधिक सुरक्षितता आणि तांत्रिक सुधारणा असलेल्या या गाडीची बांधणी चेन्नईतील रेल्वे कारखान्यात सुरू आहे. तेथेच या गाडीची शनिवारी चाचणी घेण्यात आली.
रेल्वे मंडळाने दिलेल्या उद्दिष्टानुसार गेल्या वर्षांपासून चेन्नईतील प्रकल्पात दोन हजार ७०२ रेल्वे डब्यांची निर्मिती करण्यात आली आहे. चालू वर्षांत या प्रकल्पातून ३० प्रकारच्या तीन हजार २४१ डब्यांच्या निर्मितीचे उद्दिष्ट असून, त्यात नव्या स्वरूपाच्या वंदे भारत एक्स्प्रेसचाही समावेश आहे. याच वर्षी वंदे भारत गाडय़ांचे ‘वंदे मेट्रो’ रूप सादर केले जाणार आहे. ही गाडी शहरांतर्गत जवळच्या अंतरासाठी वापरण्यात येईल. गाडीत सहजपणे चढता आणि उतरता यावे, यासाठी तिला समांतरपणे दोन्ही बाजूला उघडणारे दरवाजे असतील.
जम्मू आणि काश्मीर भागात तापमान गोठणिबदूजवळ असते. त्यामुळे तेथे चालविल्या जाणाऱ्या वंदे भारत गाडय़ांच्या डब्यात उष्ण तापमान करण्याची सुविधा आणि जलवाहिनी गोठू नये, अशी यंत्रणा विकसित केली जात आहे. पुढील वर्षी ही गाडी तयार होण्याची शक्यता आहे. त्याचबरोबर मालवाहतूक अधिक गतिमान करण्यासाठी गतिशक्ती गाडय़ा विकसित केल्या जात आहेत. ई-कॉमर्ससह जलद वाहतूक गरजेची असणाऱ्या वस्तूंसाठी या गाडय़ा महत्त्वाच्या ठरणार आहेत.
लवकरच स्लीपरचीही सोय : लांब पल्ल्याचा प्रवास करताना प्रवासी शयनयान (स्लीपर) सुविधा असलेल्या रेल्वे गाडय़ांना प्राधान्य देतात. सध्या वंदे भारत गाडय़ांमध्ये अशी सुविधा नाही. त्यामुळे स्लीपर सुविधा असलेल्या वंदे भारत गाडय़ांची निर्मिती करण्याचे नियोजन सुरू आहे. या वर्षांच्या अखेपर्यंत त्यावर शिक्कामोर्तब होईल.
नवे स्वरूप
- भगवा आणि करडा रंग. आसने अधिक आरामदायी
- मोबाइल चार्जिगसाठी अधिक चांगली सुविधा
- एक्झिक्युटिव्ह चेअर कारमध्ये पाय ठेवण्यासाठी मोठी जागा
- जास्त खोलीची वॉश बेसिन. स्वच्छतागृहात नवी प्रकाश योजना
- वाचनासाठीचा दिवा अधिक प्रवासीस्नेही
