पत्नी आणि तिच्या मित्राच्या त्रासामुळे तरुणाने केली आत्महत्या

अतुल मारुती कदम (वय ३९, रा. बालाजी काॅम्प्लेक्स, पिंपरी चौक, नाना पेठ) असे आत्महत्या केलेल्याचे नाव आहे. अतुल यांना आत्महत्येस प्रवृत्त केल्याच्या आरोपावरून पत्नी आणि तिच्या मित्राविरुद्ध गुन्हा दाखल करण्यात आला. याबाबत अतुल यांची आई माधुरी मारुती कदम (वय ६१) यांनी समर्थ पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, अतुलचा २०१५ मध्ये विवाह झाला होता. विवाहानंतर त्यांच्यात वाद सुरू झाले. पत्नीचे एकाशी मैत्रीसंबंध असल्याची माहिती अतुलला मिळाली. या कारणावरून त्यांच्यात वाद झाला. वादामुळे पत्नी वेगळी राहायला लागली. ती माहेरी निघून गेली. त्यानंतर ती आणि तिचा मित्र यांनी अतुलला त्रास देण्यास सुरुवात केली. त्याच्या मोबाइलवर संपर्क साधून धमकाविण्यात आले. पत्नी आणि तिच्या मित्राच्या त्रासामुळे अतुलने गेल्या महिन्यात १५ जून रोजी राहत्या घरी गळफास घेऊन आत्महत्या केल्याचे अतुलच्या आईने दिलेल्या फिर्यादीत म्हटले आहे. सहायक पोलीस निरीक्षक शेंडगे तपास करत आहेत.

नवले पुलाजवळ अपघातात दुचाकीवरील सहप्रवाशाचा मृत्यू

पुणे भरधाव ट्रकच्या धडकेत दुचाकीवरील सहप्रवासी तरुणाचा मृत्यू झाल्याची घटना मुंबई-बंगळुरू बाह्यवळण मार्गावरील नवले पूल परिसरात घडली. याप्रकरणी ट्रकचालकाविरुद्ध गुन्हा दाखल करण्यात आला.

अजित गोपाळ जवंडरे (वय २४) असे मृत्युमुखी पडलेल्याचे नाव आहे. अपघातात दुचाकीस्वार अभिषेक मोरे (वय २४, रा. महापूर, जि. लातूर) जखमी झाला आहे. याप्रकरणी ट्रकचालक किशन देवीलाल नायक (वय ३०, रा. राजस्थान) याच्याविरुद्ध गुन्हा दाखल करण्यात आला आहे. याबाबत माेरे याने सिंहगड रस्ता पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दुचाकीस्वार अभिषेक मोरे आणि त्याचा मित्र अजित जवंडरे हे ८ जुलै रोजी रात्री साडेअकराच्या सुमारास बाह्यवळण मार्गावरून निघाले होते. त्या वेळी नवले पुलाजवळ भरधाव ट्रकने दुचाकीला पाठीमागून धडक दिली. अपघातात दुचाकीवरील सहप्रवासी अभिषेक गंभीर जखमी झाला. अपघातानंतर घटनास्थळी न थांबता ट्रकचालक पसार झाला. गंभीर जखमी झालेल्या अभिषेकला रुग्णालयात दाखल करण्यात आले. उपचारापूर्वीच त्याचा मृत्यू झाला होता. पोलीस उपनिरीक्षक पवार तपास करत आहेत.