पिंपरी- चिंचवड: पिंपरी- चिंचवडमध्ये पत्नीवर अनैतिक संबंधाचा संशय घेऊन २९ वर्षीय तरुणाने पत्नीला जीवे मारण्याचा प्रयत्न केला आहे. घटने प्रकरणी संत तुकारामनगर पोलिसांनी आरोपी कृष्णा बाबुराव पांचाळला बेड्या ठोकल्या आहेत. लक्ष्मी शेट्टीबा दांडेकर यांनी याबाबत तक्रार दिली आहे.
पोलिसांनी दिलेल्या माहितीनुसार, चिंचवडच्या इंदिरानगर झोपडपट्टीमध्ये आरोपी कृष्णा पांचाळ आणि पत्नी लक्ष्मी कृष्णा पांचाळ यांच्यात कौटुंबिक कारणावरून जोरदार वाद झाले. कृष्णा हा नेहमी मद्यपान करायचा. बुधवारी देखील किरकोळ कारणावरून वाद झाले. हे वाद शेजाऱ्यांनी मिटवले.
परंतु, रात्री अकराच्या सुमारास त्यांच्यात पुन्हा एकदा वाद झाले. लाकडी फळी, वीट, सिमेंटच्या गट्टूने जीवे ठार मारण्याचा उद्देशाने पत्नीच्या तोंडावर आणि कपाळावर मारहाण करण्यात आली. “मी आज हिला जिवंत सोडणार नाही.” अस म्हणत लक्ष्मी ला बेदम मारहाण करण्यात आली.
लक्ष्मी रक्तबंबाळ अवस्थेत पडली होती. तिला तातडीने रुग्णालयात दाखल करण्यात आलं आहे. पत्नीचे इतर पुरुषांसोबत अनैतिक संबंध असल्याच्या संशयावरून पत्नीला मारहाण केल्याच आरोपीने पोलिसांना सांगितलं आहे. याप्रकरणी पोलिसांनी आरोपी कृष्णाला अटक केली आहे. संत तुकाराम नगर पोलीस ठाण्यात हत्येचा प्रयत्न केल्या प्रकरणी गुन्हा दाखल करण्यात आला आहे.
