पिंपरी : एका व्यक्तीने स्वतःला ग्रामसेवक भासवून ग्रामसेवकाच्या शासकीय नोकरीचे आमिष दाखवत युवकाची फसवणूक केली. ही घटना मार्च २०२४ ते जून २०२४ पर्यंत भोसरी येथे घडली.या प्रकरणी ३४ वर्षीय युवकाने भोसरी पोलीस ठाण्यात फिर्याद दिली आहे. त्यानुसार एका विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपीने फिर्यादीला ग्रामसेवक असल्याची बतावणी करून ग्रामसेवकाची शासकीय नोकरी मिळवून देण्याचे आश्वासन दिले. यावर विश्वास ठेवून फिर्यादीने आरोपीला एकूण दोन लाख रुपये दिले. फिर्यादीचा विश्वास संपादन करण्यासाठी आरोपीने भारत सरकारची राजमुद्रा असलेले खोटे नियुक्तीपत्रही दाखवले. मात्र, आरोपीने फिर्यादीला नोकरी दिली नाही आणि त्यांची फसवणूक केली. भोसरी पोलीस तपास करत आहेत.
आळंदीत जास्त परताव्याचे आमिष दाखवून ५३ लाखांची फसवणूक
एजंट असल्याची बतावणी करून एका व्यक्तीची ५३ लाख रुपयांची फसवणूक केल्याची घटना १८आळंदी देवाची येथे घडली. याबाबत ६८ वर्षीय व्यक्तीने आळंदी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, आरोपीने फिर्यादीशी संपर्क साधून स्वतःला एका कंपनीचा एजंट असल्याचे सांगितले. त्याने फिर्यादीला त्यांच्या डिमॅट खात्यात गुंतवणूक केल्यास बँकेपेक्षा जास्त परतावा मिळेल असे सांगितले. फिर्यादीने आरोपीच्या सांगण्यावरून विविध कंपन्यांचे ५३ लाख २८ हजार २७ रुपयांचे शेअर्स खरेदी केले. मात्र, कंपनी बंद झाल्यानंतर आरोपीने गुंतवणुकीची रक्कम किंवा परतावा दिला नाही. आळंदी पोलीस तपास करत आहेत.
कॅबचालकाला मारहाण
विप्रो सर्कलजवळ एका रिक्षाचालकाने कॅबचालकाला मारहाण करून जीवे मारण्याची धमकी दिली. ही घटना गुरुवारी रात्री हिंजवडी येथे घडली. या प्रकरणात कॅब चालकाने दिलेल्या फिर्यादीनुसार रिक्षाचालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादीने आरोपीला “तू माझ्या गाडीला रिक्षा का धडकवलीस” असे विचारले. यावर चिडून रिक्षाचालकाने फिर्यादीला स्टीलच्या पट्टीने मनगटावर, पायाच्या मांडीवर आणि हातातील कड्याने डोक्यात मारून जखमी केले. तसेच “तुला बघून घेतो” अशी धमकी देत शिवीगाळ केली. हिंजवडी पोलीस तपास करत आहेत.
पूर्ववैमनस्यातून घरात घुसून तोडफोड, १२ जणांवर गुन्हा
भोसरी येथे जुन्या भांडणातून १२ जणांनी एका तरुणाच्या घरात घुसून तोडफोड केली. ही घटना बुधवारी (३ सप्टेंबर) रात्री खंडेवस्ती, भोसरी येथे घडली.
या प्रकरणात १८ वर्षाच्या मुलाने एमआयडीसी भोसरी पोलीस ठाण्यात फिर्याद दिली आहे. त्यानुसार बारा जणांविरोधात विरोधात गुन्हा दाखल करण्यात आला आहे. यापैकी ऋषिकेश लष्करे, साहिल तुपसौंदर, निखिल कांबळे आणि प्रेम शर्मा यांना अटक करण्यात आली आहे.
पोलिसांनी दिलेल्या माहितीनुसार, फिर्यादी घराबाहेर थांबले असताना जुन्या भांडणातून काही आरोपी लोखंडी गज आणि काठ्या घेऊन आले. त्यांनी हवेत काठ्या फिरवून दहशत निर्माण केली आणि भांडण सोडवण्यासाठी जमलेल्या लोकांना धमकावले. त्यानंतर आरोपींनी फिर्यादीच्या घरात घुसून सामान अस्ताव्यस्त केले. घराबाहेर पडल्यानंतर काही आरोपींनी फिर्यादीच्या आई-वडिलांना शिवीगाळ करत धमकी दिली. काही आरोपींनी फिर्यादीची दुचाकी आणि दोन रिक्षांची तोडफोड करून नुकसान केले. एमआयडीसी भोसरी पोलीस तपास करत आहेत.
शस्त्र बाळगल्याप्रकरणी तरुणाला अटक
पिंपरी येथील डिलक्स चौकजवळ एका व्यक्तीला सार्वजनिक रोडवर घातक शस्त्र बाळगल्याप्रकरणी अटक करण्यात आली. ही कारवाई गुरुवारी (४ सप्टेंबर) पहाटे घडली.
अजय उदय सिंग उर्फ जिमी (३०, डिलक्स चौक, पिंपरी) असे अटक केलेल्या आरोपीचे नाव आहे. याबाबत पोलीस शिपाई प्रविण शेळके यांनी पिंपरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपीने विनापरवाना एक लोखंडी कोयता जवळ बाळगला. पोलिसांना माहिती मिळाल्यानंतर कारवाई करत अजय याला अटक केली. त्याच्याकडून २०० रुपये किमतीचा कोयता जप्त करण्यात आला आहे. पिंपरी पोलीस तपास करत आहेत.
