झणझणीत खायची इच्छा आहे? ट्राय करा खानदेशी मिरच्यांची भाजी; नोट करा सोपी रेसिपी

खानदेशी मिरच्यांची भाजी साहित्य

• १ वाटी तूरडाळ,
• साधारण एक वाटीच तुकडे होतील इतक्या हिरव्या मिरच्या (आपल्या आवडीप्रमाणे पोपटी किंवा लवंगी. पण मिरच्या अख्ख्याच ठेवायच्या आहेत)
• १ जुडी आंबट चुका किंवा चुका मिळाला नाही तर ३ हिरवे टोमॅटो
• २ मध्यम आकाराची काटेरी वांगी
• ७-८ लसूण पाकळ्या आणि १ इंच आलं यांची पेस्ट
• १ टेबलस्पून सुकं खोबरं, २ कांदे बारीक चिरून
• थोडी कोशिंबीर बारीक चिरून, २ टीस्पून काळा मसाला
• प्रत्येकी १ टीस्पून धणे-जिरे पूड, १ टेबलस्पून तेल
• मोहरी, हिंग, हळद, मीठ चवीनुसार

खानदेशी मिरच्यांची भाजी कृती

• तूरदाळ स्वच्छ धुवून एका भांड्यात घ्या. वांग्याचे आणि टोमॅटोचे मोठे तुकडे करून त्यात घाला. त्यात अख्ख्या हिरव्या मिरच्या घाला.

• तूरडाळीत नेहमीसारखं दुप्पट पाणी घालून कुकरला मऊ शिजवून घ्या.डाळ गरम असतानाच घोटा. नको असतील तर घोटण्याआधी मिरच्या काढून टाका.

• एका कढईत तेल गरम करा. नेहमीसारखी मोहरी-हिंग-हळद घालून फोडणी करा. त्यात कांदा घालून चांगला मऊ शिजू द्या.

• नंतर त्यात आलं-लसूण पेस्ट घालून २-३ मिनिटं चांगलं होऊ द्या. त्यातच सुकं खोबरं आणि कोथिंबीर घाला. हे सगळं मिश्रण चांगलं परतलं की घोटलेली डाळ घाला. चांगलं हलवून आपल्याला हवं तसं घट्ट-पातळ ठेवा.

हेही वाचा >> खान्देशी मसाला खिचडी; रात्रीच्या जेवणाला १० मिनिटांत बनवा अस्सल खानदेशी बेत

• ही भाजी जराशी घट्टच असते.आता त्यात काळा मसाला, धणे-जिरे पूड आणि मीठ घाला. चांगलं हलवून घ्या.
• मध्यम आचेवर उकळी येऊ द्या. भाजी चांगली उकळली की गॅस बंद करा.मिरचीची भाजी तयार आहे.