डोंबिवलीत फडके रोडवरुन महिलेच्या गळ्यातील मंगळसूत्र दुचाकी स्वारांनी लांबवले

हेही वाचा >>>वाद मिटविण्यासाठी गेलेल्या तरुणावर जीवघेणा हल्ला; एकाला अटक

सकाळपासून ते रात्री उशिरापर्यंत फडके रोडवर वर्दळ असते. आता गर्दीचीही भीती चोरट्यांना राहिली नसल्याची चर्चा सुरू झाली आहे. पोलिसांनी सांगितले, रेखा केवल आहिर (५८, रा. रामदेवजी सोसायटी, नेहरु रोड, डोंबिवली पूर्व) या शुक्रवारी रात्री अकरा वाजता भोजन झाल्यानंतर पती सोबत फडके रोडवरुन मदन ठाकरे चौकातून वसंत रसवंती गृहा जवळून फिरण्यासाठी चालल्या होत्या. नेहरु मैदानाला वळसा घालून ते घरी येणार होते. फडके रोडवरुन जात असताना रस्त्याच्या उलट मार्गिकेतून एक दुचाकी वेगाने आहिर दाम्पत्याच्या दिशेने आली. त्यांनी दुचाकी स्वारांना पुढे जाण्यासाठी रस्त्याच्या बाजुला उभे राहणे पसंत केले. आहिर दाम्पत्याला काही कळण्याच्या आत दुचाकी स्वाराच्या पाठीमागे बसलेल्या एका भामट्याने रेखा आहिर यांच्या मानेवर जोराने थाप मारुन त्यांच्या गळ्यातील मंगळसूत्र हिसकावले.

हेही वाचा >>>कोपरी पुलाच्या कामामुळे ठाण्यात वाहतूक बदल

रेखा यांनी चोरट्याचा हात पकडून त्याला दुचाकीवरुन खाली खेचण्याचा प्रयत्न केला. तेवढ्यात चोरट्याने रेखा यांच्या चेहऱ्यावर जोराने चापट मारली आणि त्यांना रस्त्यावर ढकलून दिले. त्या बेसावधपणे रस्त्यावर पडल्याने त्यांना मार लागला आहे. रेखा यांच्या पतीने दुचाकी स्वारांचा चोर म्हणून ओरडत पाठलाग केला. चोरटे अप्पा दातार चौकातून गणेश मंदिर दिशेने सुसाट वेगाने पळून गेले.