भाजपच्या आमदाराने कंपनीच्या संचालकाला घेतले फैलावर…; तरुणांना मिळाले अवघ्या २० मिनिटांत पैसे

भाजपच्या खोपट येथील कार्यालयात भाजपचे आमदार संजय केळकर हे जनसेवकाचा जनसंवाद हा उपक्रम राबवित आहेत. या उपक्रमात तक्रारींचा तत्काळ निपटारा होत असून काही तक्रारी पाठपुराव्यानंतर निकाली निघत आहेत. त्यामुळे दर सोमवारी आणि शुक्रवारी होत असलेल्या या उपक्रमात नागरिकांची मोठी गर्दी होत असते. सोमवारी झालेल्या उपक्रमात राबोडी पोलीस स्टेशन हद्दीतील अनधिकृत हातगाड्या, महिला रिक्षाचालकांच्या समस्या यावरही पुढील कार्यवाही सुरू करण्यात आली. यावेळी आमदार निरंजन डावखरे, अनिल भगत, दीपक जाधव, सूरज दळवी, जितेंद्र मढवी, मेघनाथ घरत, सुरेश कांबळे, मंगेश नईबागकर, तन्मय भोईर आदी उपस्थित होते.

अवघ्या २० मिनीटात पैसे दिले

भाजपच्या खोपट येथील कार्यालयात सोमवारी झालेल्या जनसेवकाचा जनसंवाद या उपक्रमात फसगत झालेले बेरोजगार तरुणांनी आमदार संजय केळकर यांची भेट घेत व्यथा मांडली. यावेळी ठाणे रेल्वे स्थानक परिसरातील शिवप्रेरणा या प्लेसमेंट सर्व्हिस कंपनीने सेवा शुल्क घेऊन नोकरीही दिली नाही आणि मागणी केल्यानंतर सेवा शुल्कही परत केले नाही, अशी तक्रार या तरुणांनी केली. यानंतर केळकर यांनी तत्काळ संबंधित कंपनीच्या संचालकांना फोन लावून फैलावर घेतले. त्यानंतर २० मिनिटांत या तरुणांच्या बँक खात्यात ऑनलाईन पैसे जमा झाले. पैसे मिळाल्याने या तरुणांनी आभार मानले.

कार्यालयांना सील ठोकू

स्थानक परिसरात आणि इतर ठिकाणी अनेक प्लेसमेंट कंपन्या असून तरुणांना रोजगार देण्याच्या नावाखाली आर्थिक फसवणूक होत असते. यात फसवणूक झालेल्या अनेक तरुणांना आम्ही त्यांचे पैसे परत मिळवून दिले आहेत. पण तरुणांनी देखील पैसे भरण्याआधी चौकशी करावी, असे आवाहन केळकर यांनी केले. अशा प्रकरणाबाबत पोलिसांकडे तक्रारी करूनही या कंपन्या सुरूच आहेत. त्यामुळे आता तक्रारी करण्याऐवजी थेट कार्यकर्त्यांना घेऊन या कार्यालयांना सील ठोकू, असा इशाराही त्यांनी दिला.

कंत्राटदाराला खडसावले

याच उपक्रमात एका कामगाराने व्यथा मांडली. काम करूनही मोबदला न मिळालेल्या कर्मचाऱ्याने देखील व्यथा मांडली. कंत्राटदाराने काम करून घेतले, पण मोबदला देण्यास टाळाटाळ करत असल्याची या कर्मचाऱ्याने तक्रार करताच श्री.केळकर यांनी संबंधित कंत्राटदाराला फोन करून चांगलेच खडसावले. अखेर दोन दिवसात कर्मचाऱ्याचे पैसे देण्याचे कंत्राटदाराने कबुल केल्याने संबंधित कर्मचाऱ्याने सुटकेचा निःश्वास टाकला. सातबारावर नाव चढवण्यासाठी ठाण्यातील एक तलाठी कर्मचाऱ्याने नागरिकांकडे पैसे मागितल्याची तक्रार पुराव्यानिशी आल्यानंतर आमदार संजय केळकर यांनी तहसीलदार उमेश पाटील यांना फोन करून कारवाईची मागणी केली. यावेळी. पाटील यांनीही सकारात्मक प्रतिसाद दिल्यानंतर तक्रारदार नागरिकाला दिलासा मिळाला.