ठाणे जिल्ह्यात भाजपचा जल्लोष, शिंदेच्या सेनेत मात्र शुकशुकाट

विधानसभा निवडणुकीत महायुतीला मोठे यश मिळाले. या निकालानंतर महायुतीत मुख्यमंत्री कोण होणार, याकडे सर्वांचे लक्ष लागले होते. महायुतीने विधानसभा निवडणुका मुख्यमंत्री एकनाथ शिंदे यांच्या नेतृत्वाखाली लढविल्या होत्या. त्यामुळे शिंदे यांना पुन्हा मुख्यमंत्री केले जाईल, अशी शक्यता वर्तवीली जात होती. तर, भाजपचे सर्वाधिक आमदार निवडुन आल्यामुळे देवेंद्र फडणवीस हेच मुख्यमंत्री होतील, अशीही चर्चा होती. मुख्यमंत्री पदावर कुणाची वर्णी लागणार याविषयी वेगवेगळ्या चर्चांना उधाण आले होते. परंतु या चर्चांना बुधवारी पुर्णविराम मिळाला. भाजप नवनिर्वाचित आमदारांची बुधवारी एक बैठक पार पडली. या बैठकीत विधीमंडळ गटनेते पदी देवेंद्र फडणवीस यांची निवड करण्यात आली. गटनेते पदी निवड झाल्याने मुख्यमंत्री पदी त्यांचीच वर्णी लागणार असल्याचे निश्चित झाले आहे. यामुळे भाजपच्या जिल्ह्यातील ठाणे आणि बदलापूर या दोन्ही शहरांमध्ये भाजपच्या पदाधिकाऱ्यांनी जल्लोष करत एकमेकांना लाडू भरविले. ठाणे शहराध्यक्ष संजय वाघुले यांच्यासह कार्यकर्त्यांनी पक्ष कार्यालय परिसरात गाण्यांवर थिरकत आनंद व्यक्त केला. यानंतर एकमेकांना लाडू भरविले. तसेच देवेंद्र फडणवीस यांच्या नावाचा जयघोष यावेळी करण्यात आला. बदलापूर शहरातही भाजपचे पदाधिकारी आणि माजी नगरसेवकांनी जल्लोष केला. असे असतानाच दुसरीकडे महायुतीमधील घटक पक्ष असलेल्या शिंदेच्या शिवसेनेत मात्र शुकशुकाट दिसून आला. कल्याण डोंबिवली या शहरात उद्या, गुरूवारी जल्लोष करण्याचे नियोजन पदाधिकाऱ्यांनी केले आहे.

राज्यात महायुतीला मोठे यश मिळाले, त्याचवेळी आम्ही विजयाचा जल्लोष साजरा केला. तसेच उद्या महायुतीचाच मुख्यमंत्री होणार असून त्याचा आम्हाला आनंद आहे.-नरेश म्हस्के,ठाणे खासदार, शिवसेना (शिंदे गट)