दिवा-वसई रेल्वे मार्गावरील अप्पर कोपर रेल्वे स्थानकाच्या दरम्यान बुधवारी रात्री रेल्वे मार्गात तरुण, तरुणींचे मृतदेह सापडल्याने खळबळ उडाली आहे. डोंबिवली लोहमार्ग पोलीस ठाण्यात याप्रकरणी अपघाती मृत्युची नोंद करण्यात आली आहे.
हेही वाचा- भिवंडी: दुसऱ्या मजल्यावरून पडून एकाचा मृत्यू
अज्ञात एक्सप्रेसने दिलेल्या धडकेत या दोघांचा मृत्यू झाला की प्रेमभंगातून त्यांनी आत्महत्या केली याविषयी विविध तर्क काढले जात आहेत. बुधवारी रात्री साडे अकरा वाजता दिवा-वसई मार्गावर अप्पर कोपर रेल्वे स्थानकाच्या दरम्यान रेल्वे मार्गात एक तरुण, एक तरुणी मृतावस्थेत पडले आहेत, अशी माहिती डोंबिवली लोहमार्ग पोलिसांना मिळाली. पोलिसांनी तातडीने घटनास्थळी धाव घेतली. त्यांचे मृतदेह ताब्यात घेऊन शवविच्छेदनासाठी ते पालिकेच्या कल्याण मधील रुक्मिणीबाई रुग्णालयात पाठविण्यात आले. या मृतदेहांची ओळख पटविण्याचे काम पोलिसांकडून सुरू आहे. मोठागाव, कोपर भागातील नागरिक रात्री रेल्वे मार्गात जमा झाले होते.
