Video: दीपेश म्हात्रेंच्या तुऱ्यात ‘कमळ’…डोंबिवलीचा उगवता सूर्य, जनसेवक म्हणून बॅनरबाजी

भाजपचे प्रदेशाध्यक्ष आणि स्थानिक आमदार रवींद्र चव्हाण गणेशोत्सवाच्या काळात घरोघरचे गणपती दर्शनाचा भाग म्हणून ठाकरे गटाचे जिल्हाध्यक्ष दीपेश म्हात्रे यांच्या डोंंबिवलीतील मोठागाव मधील घरी गणपती दर्शनासाठी गेले होते. दीड वर्षात दीपेश म्हात्रे यांनी आमदार रवींद्र चव्हाण यांच्यावर टीका करण्याची एकही संधी सोडली नव्हती. अशात गणपतीच्या काळात चव्हाण, म्हात्रे एका सोफ्यावर बसून दिलखुलास गप्पा मारत असल्याच्या प्रतिमा समाज माध्यमांत प्रसारित झाल्या. त्यानंतर दीपेश म्हात्रे आणि चव्हाण गटाकडून एकमेकांवर समाज माध्यमांतून करण्यात येणारे टीका युध्द पूर्ण थांबले.

दरम्यानच्या काळात दीपेश म्हात्रे माजी केंद्रीय मंत्री कपील पाटील यांच्या छत्रछायेखाली भाजपमध्ये येणार असल्याची चर्चा सुरू झाली. प्रदेशाध्यक्ष चव्हाण, दीपेश म्हात्रे यांच्या गुफ्तगू बैठका झाल्याची चर्चा आहे. गेल्या दीड वर्षाच्या काळात विकास कामे, नागरी समस्या अशा अनेक विषयांवर सत्ताधारी भाजप-शिंदे शिवसेनेच्या विरोधात आक्रमक असलेले दीपेश म्हात्रे अचानक थंडावल्याने दीपेश म्हात्रे भाजपच्या वाटेवर असल्याची चर्चा सुरू झाली.

आगामी पालिका निवडणुकांचा विचार करून नोव्हेंबरच्या पहिल्या आठवड्यात दीपेश म्हात्रे भाजपमध्ये प्रवेश करणार असल्याच्या वावड्या उठल्या आहेत. याविषयी काही खरे नाही असे दीपेश म्हात्रे ठासून सांगतात. त्यांचे समर्थक आमचे दीपेश शेठ असे काही करणार नाहीत असे जीव तोडून सांगतात.

डोंबिवलीत नवा सूर्य

अशा परिस्थितीत दोन दिवसांपासून डोंबिवलीच्या राजकारणात नवा सूर्य उगवतोय, विकासाचा चेहरा, जनसेवक अवतरतोय, अशा प्रकारच्या दीपेश म्हात्रे यांच्या दिलखुलास, गुबगुबीत हसऱ्या चेहऱ्याच्या समाज माध्यमांतून दृश्यध्वनी चित्रफिती झळकवाल्या जात आहेत. एका चित्रफितीला तर भाजपच्या एका ज्येष्ठ आमदाराच्या आवाजाची झालर आहे. विशेष म्हणजे या चित्रफितींवर कोठेही ठाकरे गटाचे मशाल चिन्ह, कोणत्याही पक्षाचा नेता, झेंडा यांचा उल्लेख नाही. या चित्रफितीमधील स्वाभिमानाची मूठ मात्र प्रकर्षाने नागरिकांच्या नजरेत येते. कोणी कितीही झाकण्याचा प्रयत्न केला तरी सूर्य तो सूर्य तो उगवणारच, असा उपरोधिक टोमणाही या चित्रफितीमधून विरोधकांना हाणला आहे.

दीपेश म्हात्रे एका दृश्यध्वनी चित्रफितीत म्हणतात, ‘माझा उपयोग माझ्या लोकांसाठी झाला नाही तर त्या पद, प्रतिष्ठेचा काही उपयोग नाही, असे मानणारा मी कार्यकर्ता आहे.’ ‘ज्याचा आता नंबर लागणार आहे. तो उगवता सूर्य आहे. त्याला कोणी किती झाकण्याचा प्रयत्न केला तरी तो नव्या दमाने उगवणारच आहे.’ अशा शब्दांमध्ये दीपेश म्हात्रे यांचा गवगवा करण्यात आला आहे.

महापौर, आमदार

येणाऱ्या काळात डोंबिवली विधानसभेचे दोन विधानसभा मतदारसंघ झाले तर भाजपचा आमदार, आगामी पालिका निवडणुकीनंतर पालिकेवर भाजपला आपलाच महापौर बसवायचे आहे. त्यामुळे नव्या दमाचा खिलाडी म्हणून दीपेश यांच्या विचार भाजपकडून करण्यात आल्याची चर्चा आहे. तोपर्यंंत प्रदेशाध्यक्ष चव्हाण यांनी राजकारणातील पुढच्या टप्प्यांवर असतील अशी चर्चा आहे.