नौपाडय़ाचा प्रवास नकोसा होणार!

महात्मा गांधी रस्त्याच्या काँक्रीटीकरणाची निविदा
पावसाळ्यामध्ये अभूतपूर्व वाहतूक कोंडीची भीती
मुंबई महानगर विकास प्राधिकरणामार्फत नौपाडा येथील महात्मा गांधी मार्गावरील सरस्वती शाळेलगत उभारण्यात येत असलेल्या उड्डाणपुलाच्या कामामुळे ठाणे शहराच्या वाहतुकीची धमणी मानला जाणाऱ्या गोखले तसेच आसपासच्या मार्गावर वाहतुकीची अभूतपूर्व अशी कोंडी होत असतानाच ठाणे महापालिकेने याच रस्त्याचे काँक्रीटीकरण करण्याचा हट्ट कायम ठेवत सुमारे अडीच कोटी रुपयांची निविदा काढली आहे. गेल्या काही महिन्यांपासून महापालिकेने ठाणे शहरात रस्ता रुंदीकरणाचा अक्षरश: सपाटा लावला आहे. ही कामे करीत असताना अभियांत्रिकी विभागाने ठोस नियोजन करण्याची आवश्यकता यापूर्वीही व्यक्त झाली आहे. असे असताना उड्डाणपुलाचे काम सुरू असताना त्याच रस्त्यावर काँक्रीटचा मुलामा देण्याची घाई कशासाठी, असा सवाल उपस्थित होऊ लागला आहे. महापालिकेच्या या हट्टामुळे येत्या पावसाळ्यात या मार्गावर अभूतपूर्व अशी वाहतूक कोंडी होईल, अशी भीती व्यक्त होत असून आयुक्त संजीव जयस्वाल यांनीही या निविदा प्रक्रियेस हिरवा कंदील दाखविल्याने आश्चर्य व्यक्त केले जात आहे.
ठाणे महापालिकेच्या विकास आराखडय़ात नमूद केल्यानुसार रस्त्यांची रुंदी असावी, असा महापालिका आयुक्त संजीव जयस्वाल यांचा आग्रह आहे. त्यामुळे शहरातील वेगवेगळ्या भागांमध्ये रस्ता रुंदीकरणाची कामे युद्धपातळीवर हाती घेण्यात आली असून या कामात अडथळा ठरणाऱ्या बांधकामांविरोधात जोरदार मोहीम हाती घेण्यात आली आहे. हे करीत असताना ठाणे रेल्वे स्थानकाच्या दिशेने जाणाऱ्या मूळ शहरातील महत्त्वाच्या रस्त्यांच्या रुंदीकरणाची योजना महापालिकेने आखली आहे. त्यानुसार गोखले मार्ग, राम मारुती रोड, जुना स्टेशन रोड, तीन हात नाका ते माजिवडा चौक अशा काही महत्त्वाच्या रस्त्यांचे रुंदीकरण तसेच काँक्रीटीकरण केले जाणार आहे. या कामांसाठी तब्बल २७ कोटी रुपयांची तरतूद पालिकेने केली आहे. रेल्वे स्थानकाला जाताना प्रवाशांना रुंद रस्ते मिळावेत आणि कोंडीविरहित प्रवास करीत यावा, असा उद्देश यामागे आहे.