नवी मुंबई पालिकेच्या परिवहन सेवेच्या बसमधून गॅस गळती; सुदैवाने जीवित हानी नाही

बस थांबताच प्रवाशांना सुखरुप बाहेर काढण्यात आहे. नागरिकांच्या सतर्कतेमुळे मोठा अनर्थ टळला. काही दिवसापूर्वी मेट्रो माॅल समोर नवी मुंबई परिवहन सेवेच्या बसला रात्रीच्या वेळेत अचानक आग लागली होती. ही घटना ताजी असताना आज या उपक्रमातील एका बसमधून गॅस गळती झाली.नवी मुंबई पालिका परिवहन उपक्रमाची एक बस सोमवारी सकाळी कल्याणकडे शिळफाटा रस्त्याने येत होती. बसच्या सीएनजी टाकीमधून गॅस बाहेर पडत असल्याचे पादचाऱ्यांच्या निदर्शनास आले.

हेही वाचा : डोंबिवली: लोढा पलावामधील गुंतवणूक संस्थेकडून ३०० गुंतवणूकदारांची पाच कोटींची फसवणूक

जागरुक नागरिकांनी तात्काळ ओरडा केला. बस चालकाला बस थांबविण्याचा इशारा केला. चालकाने बस थांबविल्यानंतर चालकाला सीएनजी गॅस टाकीतून मोठ्या प्रमाणात गॅस बाहेर पडत असल्याचे पाहिले. वाहक, चालकाने तात्काळ अग्निशमन जवानांना संपर्क केला. जवान घटनास्थळी येताच त्यांनी टाकीवर पाण्याचा मारा करुन गॅस गळती रोखली. ही घटना निदर्शनास आली नसती तर आगीचा भडका उडून अनर्थ घटना घडली असती असे प्रत्यक्षदर्शींनी सांगितले. गॅस गळती कशी झाली याचा तपास परिवहन उपक्रमाच्या तांत्रिक पथकाने सुरू केला आहे.