“गुरुपौर्णिमा म्हणजे निष्ठा आणि विश्वास” अशी प्रतिक्रिया देत शिवसेना खासदार राजन विचारे यानी अप्रत्यक्षरीत्या मुख्यमंत्री एकनाथ शिंदे यांच्यावर निशाणा साधला. बाळासाहेब ठाकरे आणि आनंद दिघे हे माझे गुरु असल्याचे सांगत या दोघांनीही तळागाळापर्यंत शिवसेना नेऊन शेवटपर्यंत संघटनेसाठी काम केल्याचे त्यांनी सांगितले.
गुरुपौर्णिमा : मुख्यमंत्री एकनाथ शिंदे टेंभीनाका येथील आनंद दिघेंच्या स्मृतीस्थळावर नतमस्तक होणार
आनंद दिघे यांचे शिष्य मुख्यमंत्री एकनाथ शिंदे आणि खासदार राजन विचारे हे नेहमी एकत्रित संघटनेचे काम करताना दिसायचे. एकनाथ शिंदे यांनी वेगळा गट स्थापन केल्यानंतर राजन विचारे त्यांच्या सोबत जातील असे सांगितले जात होते. परंतु ते उद्धव ठाकरे यांच्यासोबतच असल्याचे दिसून येत आहे. तसेच शिंदे यांच्या बंडानंतर विचारे यांनी माध्यमांसमोर अद्याप प्रतिक्रिया दिली नव्हती. आज विचारे यांनी गुरुपौर्णिमेनिमित्त आनंद आश्रमात येऊन बाळासाहेब ठाकरे आणि आनंद दिघे यांच्या फोटोला पुष्पहार अर्पण केला. त्यावेळेस आश्रममध्ये शिंदे गटाचे समर्थकही उपस्थित होते. त्यानंतर ते शक्तिस्थळावर देखील गेले होते. यावेळेस त्यांनी माध्यमांसमोर पहिल्यांदाच प्रतिक्रिया दिली.
तळागाळातील लोकांना न्याय देण्याचे काम हा सर्वसामान्य शिवसैनिक करत आहे –
“ बाळासाहेब ठाकरे यांच्या आशीर्वाद आणि आनंद दिघे यांची शिकवण यामुळेच आज आमच्यासारखा सर्वसामान्य शिवसैनिक हा खासदार पदापर्यंत पोहोचू शकला.”, असल्याचे त्यांनी यावेळी सांगितले. तसेच, “या दोन्ही नेत्यांमुळेच मागील ४० वर्षे मी एक सर्वसामान्य शिवसैनिक म्हणून काम करीत आहे. मराठी माणसांसाठी आणि हिंदुत्वासाठी काम करीत आहे. तळागाळातील लोकांना न्याय देण्याचे काम हा सर्वसामान्य शिवसैनिक करत आहे. ८० टक्के समाजकारण आणि २० टक्के राजकारण या ध्येयानेच आम्ही शिवसेनेच्या माध्यमातून काम करीत आहोत. आनंद दिघे हे शेवटच्या श्वासापर्यंत शिवसेना एके शिवसेना अशा पद्धतीने तळागाळातील लोकांसाठी तसेच ठाणे जिल्ह्याबरोबरच महाराष्ट्रासाठी काम करीत होते. बाळासाहेब ठाकरे आणि आनंदी दिघे या दोघांनीही तळागाळापर्यंत शिवसेना नेऊन शेवटपर्यंत संघटनेसाठी काम केले.” असे विचारे यांनी सांगितले. यावेळी विचारे यांनी इतर राजकीय विषयावर भाष्य करण्यास नकार दिला.
