भाज्यांचे दर चढणीवरच

पुणे जिल्ह्यतील मुसळधार पावसाचा फटका; उपवासाची रताळीही महाग:- श्रावण महिन्यापासून सुरू असलेली भाजी बाजारातील तेजी अजूनही कायम असून कांदा आणि टोमॅटोपाठोपाठ अन्य भाज्यांचे दरही पुन्हा उसळी मारत आहेत. गेल्या आठवडय़ात पुणे जिल्ह्यासह राज्यातील बागायती पट्टय़ात झालेल्या मुसळधार पावसामुळे भाजीपिकांचे नुकसान झाल्याने मुंबई, ठाण्यातील भाजी आवक मंदावली असून त्याचा परिणाम दरवाढीत झाला आहे. त्याचबरोबर उपवासासाठी वापरण्यात येणारे रताळेदेखील महाग झाले आहे.

पुणे, नाशिक, सोलापूर या जिल्ह्य़ांतून येणाऱ्या भाजीपाल्याची मुंबई, ठाणे आणि उपनगरांमधील किरकोळ बाजारात मोठय़ा प्रमाणावर विक्री होती. मात्र सध्या या भागातून येणाऱ्या भाज्यांची आवक घटल्याची माहिती समोर आली आहे. पावसाने तीन ते चार दिवसांपासून पुणे, नाशिक जिल्ह्य़ांना अक्षरश झोडपून काढले. मुसळधार पावसाचा परिणाम, येथील पिकांवर देखील झाला आहे. परिणामी, भाज्यांची आवक कमी झाल्यामुळे भाज्यांच्या किमतीत वाढ झाली आहे. वाशी कृषी उत्पन्न बाजार समितीत रोज भाज्यांच्या ६०० गाडय़ा येतात. गेल्या दोन ते तीन दिवसांपासून भाज्यांच्या ५०० ते ५५० गाडय़ा दाखल झाल्या आहेत. त्यामुळे घाऊक बाजारातील भाज्यांचे दरही वाढू लागले आहेत. मागील आठवडय़ात घाऊक बाजारात गवारची विक्री ४४ रुपये किलो होती. सद्य:स्थितीत गवारची विक्री ६० रुपये किलोने होत आहे. फरसबी घाऊक बाजारात मागील आठवडय़ात ५० रुपये किलोने विकली जात होती. आता हा दर ५५ रुपये किलो आहे. आठवडाभरापूर्वी घेवडा घाऊक बाजारात ४० रुपये किलो होता.

रताळी महाग

नवरात्रोत्सवात अनेक जण उपवास करत असतात. उपवासासाठी रताळ्याचे पदार्थ खाण्याकडे अनेकांचा कल असतो. तापमानात झालेल्या बदलामुळे रताळ्याचे अपेक्षित उत्पादन येत नसल्याने रताळ्याचीही आवक घटल्याची माहिती समोर आली आहे. किरकोळ बाजारात रताळ्याची विक्री गेल्या आठवडय़ात प्रति किलो ३५ रुपये दराने होत होती. मात्र सध्या रताळ्याची विक्री ४० रुपये दराने होत आहे.

अनेक जिल्ह्य़ात पावसाने पुन्हा हजेरी लावल्यामुळे बऱ्याच ठिकाणी भाज्यांचे मोठय़ा प्रमाणात नुकसान झाले आहे. भाज्यांची आवक कमी झाल्यामुळे भाज्यांच्या किमतीत वाढ झाली आहे. यापुम्ढेही पाऊस असाच राहिला तर, भाज्यांच्या किमतीत आणखी वाढ होऊ शकते.

– सुधाकर जाधव, भाजी विक्रेते