कल्याणमधील गांधारी नदीत मातीचे भराव टाकून बेकायदा बांधकाम, आमदार विश्वनाथ भोईर यांची जिल्हाधिकारी, कडोंमपा आयुक्तांकडे तक्रार

कल्याण पश्चिम या आपल्या विधानसभा मतदारसंघात पावसाळ्यात कोठेही पाणी तुंबण्याचे, पूर परिस्थिती निर्माण होण्याचे प्रकार होऊ नयेत म्हणून आपण दोन दिवसापूर्वी आपल्या मतदारसंघात फिरत होतो. ही पाहणी करत असताना आपण कल्याण पश्चिमेतील कल्याण पडघा रस्त्यावरील गांधारी नदी भागात आलो. त्यावेळी आपणास गांधारी नदी पुलाच्या दोन्ही बाजुला माती, मलब्याचे वीस ते पंचविस फुटाचे भराव टाकून त्यावर बेकायदा बांधकाम सुरू असल्याचे आढळून आले. नदीत भराव टाकून सुरू असलेल्या या बांधकामामुळे मुसळधार पाऊस असेल, गांधारी नदी दुथडी भरू वाहू लागली तर पुलाचे पाणी नदी परिसरातील आसपासच्या गांधारे, बारावे, वाडेघर आणि आजुबाजुच्या नव्याने उभ्या राहिलेल्या गृहसंकुलांमध्ये पसरू शकते असे आपल्या निदर्शनास आले, असे आमदार भोईर यांनी सांगितले.

या भरावामुळे नदी पात्राचा अर्धा भाग बुजविण्यात आला आहे. या भागातील रानचिंच, इतर झाडे नष्ट करण्यात आली आहेत. नदी पात्र बुजवून कोणालाही बांधकाम करण्याचा अधिकार नाही. गांधारी नदीत भराव टाकल्याप्रकरणी आपण ठाणे जिल्हाधिकारी अशोक शिनगारे, पालिका आयुक्त अभिनव गोयल, सार्वजनिक विभागाचे मुख्य आणि अधीक्षक अभियंता यांच्याकडे तक्रार केली आहे, असे आमदार भोईर यांनी सांगितले.

गांधारी पुलाशी संबंधित नियंत्रक अधिकाऱ्यांनी नदी पात्रातील भराव आणि बेकायदा बांधकामाची पाहणी करून ते बांधकाम तातडीने निष्कासित होईल या दृष्टीने कारवाई करावी. या बेकायदा बांधकामाला कोणाचाही राजकीय आशीर्वाद असला तरी त्याची पर्वा आम्ही करणार नाही. राज्यात आमचे सरकार आहे. जो कोणी या बेकायदा बांधकामाचा पाठीराखा राजकीय व्यक्ति असेल तर त्याच्यावरही कारवाईसाठी सरकार पाऊल उचलेल यासाठी प्रयत्न केले जातील, असे आमदार भोईर यांनी सांगितले.

एका माणसाच्या फायद्यासाठी नदी काठचे शेकडो रहिवासी वेठीस धरले जाऊ शकत नाहीत. हा बांधकामासाठीचा भराव संबंधित बांधकामधारकांकडून काढून टाकण्यासाठी पालिका, शासकीय यंत्रणांनी हालचाली कराव्यात, अशी आपण मागणी केली आहे. गेल्या काही दिवसापूर्वी उल्हास नदी पात्रात बदलापूर भागात भराव करणाऱ्या एका संस्थेला महसूल विभागाने दहा कोटीचा दंड ठोठावला आहे. तशीच कारवाई या भागातील बांधकामधारकांवर कारवाई करावी, अशी मागणी पर्यावरणप्रेमींनी केली आहे.