scorecardresearch

कल्याणमध्ये टेम्पो अंगावरून गेल्याने पाळीव श्वानाचा मृत्यू

रामबाग गल्ली क्रमांक तीनमध्ये एका टेम्पो चालकाच्या निष्काळजीपणामुळे एका पाळीव श्वानाचा टेम्पोखाली येऊन मृत्यू झाला.

कल्याणमध्ये टेम्पो अंगावरून गेल्याने पाळीव श्वानाचा मृत्यू
कल्याणमध्ये टेम्पो अंगावरून गेल्याने पाळीव श्वानाचा मृत्यू (प्रातिनिधिक छायाचित्र)

कल्याण – येथील रामबाग गल्ली क्रमांक तीनमध्ये एका टेम्पो चालकाच्या निष्काळजीपणामुळे एका पाळीव श्वानाचा टेम्पोखाली येऊन मृत्यू झाला. याप्रकरणी पाळीव श्वानाच्या मालकाने टेम्पो चालकाविरुद्ध महात्मा फुले पोलीस ठाण्यात तक्रार केली आहे. पोलिसांनी प्राण्यांचा छळ प्रतिबंधक कायद्याने गुन्हा दाखल करून तपास सुरू केला आहे.

सचिन दराडे (वाहन क्र. एमएच-०५-एझेड-०५१४) असे आरोपी टेम्पो चालकाचे नाव आहे. केदार करंबेळकर (२६, रा. ओम सदगुरू कृपा सोसायटी, रामबाग गल्ली क्र. ३, कल्याण पश्चिम) असे तक्रारदाराचे नाव आहे. ते व्यावसायिक आहेत. केदार यांनी एक कुत्री पाळली होती. ती नियमित सोसायटी परिसरात फिरत असायची. गेल्या आठवड्यात रामबाग गल्ली क्रमांक तीनमधील सुजय आणि सुभाष इमारतीसमोरील सार्वजनिक रस्त्यावर सचिन दराडे या चालकाचा टेम्पो उभा होता. या टेम्पोखाली केदार यांची पाळीव कुत्री बसली होती. चालक सचिन याने टेम्पोखाली कोणी आहे का, याची तपासणी न करता थेट टेम्पोत जाऊन टेम्पो मागे घेण्यास सुरुवात केली. यावेळी टेम्पोखाली बसलेल्या कुत्रीच्या पायावरून टेम्पोचे चाक जाऊन ती मोठ्याने विव्हळू लागली.

हेही वाचा – डोंबिवली रेल्वे स्थानकात छप्पर, सरकत्या जिन्याचे काम रखडले, प्रवाशांना उन्हाचे चटके

हेही वाचा – ठाणे : मुंबई-नाशिक महामार्गावरील साकेत पुलाजवळ रेड्याचा अपघातात मृत्यू

कुत्रीचा ओरडण्याचा आवाज ऐकून केदार घराबाहेर आले. तोपर्यंत परिसरातील रहिवासी टेम्पो चालक सचिन याला टेम्पो जागीच थांबविण्याची आणि टेम्पोखाली कुत्री असल्याची सूचना करत होते. रहिवाशांच्या ओरडण्याकडे लक्ष न देता सचिनने टेम्पो पुढे घेतला. टेम्पोचे चाक कुत्रीच्या अंगावरून गेल्याने ती जागीच मरण पावली. महात्मा फुले पोलीस ठाण्याचे हवालदार शिवाजी राठोड या प्रकरणाचा तपास करत आहेत.

मराठीतील सर्व ठाणे ( Thane ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 16-03-2023 at 12:10 IST
ताज्या बातम्या