ठाकुर्ली रेल्वे उड्डाण पुलावरील प्रवाशांना जीवघेणे ठरणारे फलक हटविले, पुलाचे विद्रुपीकरण केल्यास फौजदारी गुन्हे

ठाकुर्ली पुलावर कोणीही बेकायदा फलक लावले तर त्यांच्यावर फौजदारी कारवाई करण्याचा इशारा साहाय्यक आयुक्त मुंबरकर यांनी दिला आहे. गेल्या काही दिवसांपासून ठाकुर्ली पुलाच्या दोन्ही बाजुला टुकार दादा, भाईंचे वाढदिवस, सण, उत्सवांच्या शुभेच्छांचे फलक लावण्यात येत आहेत. सोसायट्याचा वारा आला की दोरीने बांधलेले हे फलक तुटून रेल्वे मार्ग किंवा रस्ते मार्गावर पडतात. हे फलक रस्ते मार्गावरून जाणाऱ्या दुचाकी स्वारांच्या अंगावर पडले तर गंभीर दुखापत होण्याची शक्यता आहे. तसेच रेल्वे मार्गावरून धावणाऱ्या मेल, लोकलच्या समोर, दारात उभ्या असलेल्या प्रवाशांच्या अंंगावर पडून अपघाताची शक्यता होती.

फ प्रभागाच्या साहाय्यक आयुक्त हेमा मुंबरकर यांना ठाकुर्ली रेल्वे पुलावर दोन मोठे फलक रेल्वे मार्गात किंवा रस्त्यावर पडण्याची शक्यता आहे. त्यामुळे पुलावरील रस्त्यावरून जाणाऱ्या प्रवाशाला किंवा रेल्वे मार्गावरील प्रवाशाला जीविताला धोका निर्माण झाली आहे, अशी माहिती एका जागरूक नागरिकाने दिली. साहाय्यक आयुक्त मुंबरकर यांनी तातडीने फेरीवाला हटाव पथकासह ठाकुर्ली उड्डाण पुलावर जाऊन ते बेकायदा फलक काढले.

ठाकुर्ली, कोपर, पत्रीपुलावर बेकायदा फलक लावले की सततच्या वाऱ्यामुळे हे फलक अनेक वेळा उडून पुलावरून जाणाऱ्या प्रवाशांच्या अंगावर पडतात. यामध्ये दुचाकी स्वार आला तर मोठी दुर्घटना घडते. असे प्रकार यापूर्वी घडले आहेत. पुलावर फलक लावल्याने अपघात होतात हे माहिती असुनही अनेक राजकीय स्थानिक पदाधिकारी, नेते अपघाताची पर्वा न करता लोकांना आपली प्रतीमा पाहण्यास मिळतेय ना याचा विशेष आनंद असतो. या बेकायदा फलकांमुळे काही दुर्घटना घडली की मग हे स्थानिक स्वयंंघोषित पदाधिकारी, नेते लपून बसतात.