ठाणे : करोनानंतर म्हणजेच गेल्या सहा वर्षांपासून बंद पडलेली ठाणे मॅरेथाॅन स्पर्धा यंदाच्या वर्षापासून घेण्याचे नियोजन आखले आहे. येत्या १० ऑगस्ट रोजी ही स्पर्धा घेण्याचे पालिकेने निश्चित केले असून त्यासाठी स्पर्धेच्या कार्यालयाचे उद्घाटन शुक्रवारी महापालिका आयुक्त सौरभ राव यांच्या हस्ते झाले. ‘मॅरेथॉन ठाण्याची… उर्जा तरुणाईची’ असे यंदाच्या मॅरेथॉन स्पर्धेचे सूत्र आहे. ठाणे महापालिका वर्षा मॅरेथॉनच्या बोधचिन्हाचे अनावरण आयुक्तांच्या हस्ते करण्यात आले.
ठाणे महानगरपालिका आणि ठाणे जिल्हा ॲथलेटिक्स असोसिएशन यांच्या संयुक्त विद्यमानेही राज्य पातळीवर मॅरेथॉन स्पर्धा घेण्यात येते. या स्पर्धेत मुंबई ठाण्यातीलच नव्हे तर महाराष्ट्रातून अनेक स्पर्धक सहभागी होत असतात. त्याचप्रमाणे आर्मीमधील नामवंत खेळाडू सहभागी होत असतात. देश आणि जागतिक पातळीवर धावपट्टू निर्माण करणे या उद्देशातून ही स्पर्धा घेण्यात येते. या स्पर्धेत शहरातील विद्यार्थ्यांपासून ते ज्येष्ठांपर्यंत असे सर्वजण मोठ्या संख्येने सहभागी होतात. २१ ते ५ किमी अंतरपर्यंतची स्पर्धा असते. या स्पर्धेच्या माध्यमतून विविध सामाजिक संदेश दिले जातात. ही स्पर्धा आता सहा वर्षांनंतर होणार आहे. या स्पर्धेत ठाणेकरांनी मोठ्या संख्येने सहभागी व्हावे असे आवाहन आयुक्त राव यांनी केले आहे.
स्पर्धा का होऊ शकली नव्हती
करोना संसर्गामुळे ही स्पर्धा रद्द करण्यात आली होती. करोना काळानंतर जनजीवन पुर्वपदावर आले. यानंतर पालिकेची पंचवार्षिक मुदत संपुष्टात आली आणि पालिकेत प्रशासकीय राजवट लागू झाली. यामुळे गेल्या सहा वर्षांपासून ही स्पर्धा होऊ शकली नव्हती. ठाणे महापौर वर्षा मॅरेथाॅन असे स्पर्धेचे नाव असते. महापौरांच्या अध्यक्षतेखाली ही स्पर्धा घेण्यात येते. परंतु पालिकेत प्रशासकीय राजवट असल्याने या स्पर्धेचे नाव बदलण्यात आले असून ठाणे महापालिका वर्षा मॅरेथाॅन स्पर्धा या नावाने ही स्पर्धा घेण्यात येत आहे.
नोंदणीसाठी कार्यालय कुठे
यंदाच्या वर्षांपासून ही स्पर्धा पुन्हा घेण्यासाठी पालिकेच्या क्रीडा विभागाने पाऊले उचलली होती. अखेर स्पर्धा घेण्याचे निश्चित झाले असून १० ऑगस्ट रोजी ही स्पर्धा होणार आहे. स्पर्धकांना नोंदणी करता यावी तसेच स्पर्धेबाबत मार्गदर्शन मिळावे यासाठी ठाणे महापालिकेतील पहिल्या मजल्यावरील धर्मवीर आनंद दिघे सभागृहात मॅरेथॉन कार्यालय सुरू करण्यात आले आहे. या स्पर्धेच्या कार्यालयाचे उद्घाटन शुक्रवारी महापालिका आयुक्त सौरभ राव यांच्या हस्ते झाले. स्पर्धेत सहभागी होणाऱ्या स्पर्धकांना मॅरेथॉन स्पर्धेची संपूर्ण माहिती मिळावी तसेच स्पर्धेचे प्रवेश अर्ज, चेस्ट नंबर आदी अनुषंगिक कामांची पूर्तता मॅरेथॉनचे कार्यालयात करण्यात येणार असल्याचे राव म्हणाले. यावेळी अतिरिक्त आयुक्त संदीप माळवी, प्रशांत रोडे, नगरअभियंता प्रशांत सोनग्रा, उपायुक्त मनिष जोशी, मीनल पालांडे, ठाणे जिल्हा ॲथलेटिक्स असोसिएशनचे पदाधिकारी, ठाणेकर ज्येष्ठ नागरिक, शाळेचे विद्यार्थी मोठ्या संख्येने उपस्थित होते.
एकूण १२ गटात स्पर्धा
या स्पर्धेत ३० हजाराहून नागरिक, ठाणे शहरातील शाळांमधील विद्यार्थी, ज्येष्ठ नागरिक, सेलिब्रेटी, लोकप्रतिनिधी सहभागी होणार आहेत. शालेय विद्यार्थ्यापासून ते ज्येष्ठ नागरिकांपर्यत विविध १२ गटात ही स्पर्धा होणार आहे. नागरिकांमध्ये आरोग्यविषयक तसेच क्रिडाविषयक जागरुकता वाढली पाहिजे हा या मागचा हेतू असल्याचे आयुक्त सौरभ राव यांनी नमूद केले. यावेळी आयुक्तांच्या हस्ते ज्येष्ठ नागरिक, शालेय विद्यार्थी यांना स्पर्धेचे अर्ज वाटप करण्यात आले. यावेळी ठाणे जिल्हा ॲथलेटिक्स असोसिएशनचे उपाध्यक्ष प्रमोद कुलकर्णी, कृष्णकुमार कोळी, सचिव अशोक आहेर, खजिनदार भूपेंद्र ठाणेकर, सदस्य एकनाथ पवळे, सचिन मराठे, सुशांत पाटील आदी उपस्थित होते.
