TMT News : टिएमटीच्या ताफ्यातील नवीन विद्युत बसगाड्यांची प्रतिक्षा; पीएम ई बस सेवा योजनेंतील शंभर बसगाड्या

Due to technical reasons, no buses could enter the fleet

तांत्रिक कारणामुळे एकही बसगाड्या ताफ्यात दाखल होऊ शकलेली नाही (संग्रहित छायाचित्र)

ठाणे – ठाणे परिवहन उपक्रमाच्या (टिएमटी) ताफ्यात १२३ विद्युत वातानुकूलीत विद्युत बसगाड्या दाखल झाल्याने ठाणेकरांचा प्रवास गारेगार होत असतानाच, त्यापाठोपाठ केंद्र शासनाच्या पीएम ई बस सेवा योजनेंतर्गत शंभर विद्युत वातानुकूलीत विद्युत बसगाड्या यंदाच्या वर्षभरात दाखल होणार होत्या. त्यापैकी २५ बसगाड्या ऑगस्ट महिनाअखेरीस दाखल होणार होत्या. मात्र, सप्टेंबर महिना उजाडला तरी या बसगाड्या टिएमटीला उपलब्ध होऊ शकलेल्या नाहीत. तांत्रिक कारणामुळे आणखी एक महिना या बसगाड्यांची प्रतिक्षा ठाणेकरांना करावी लागणार आहे.

ठाणेकरांना दर्जेदार सार्वजनिक वाहतूकीची सुविधा उपलब्ध व्हावी, ठाणेकरांचा प्रवास गारेगार व्हावा आणि शहरातील पर्यावरणाचा समतोल राखला जावा यासाठी पर्यावरणपुरक विद्युत बसगाड्यांची खरेदी ठाणे महापालिका परिवहन उपक्रमाकडून खरेदी केली जात आहे. त्याचाच एक भाग म्हणून केंद्र आणि राज्य शासनाच्या १५ व्या वित्त आयोग तसेच पीएम ई बस सेवा योजनेंतर्गत पालिकेला एकूण ४०३ विद्युत बसगाड्या उपलब्ध होणार असून त्यापैकी १२३ बसगाड्या काही वर्षांपुर्वी परिवहनच्या ताफ्यात दाखल झालेल्या आहेत.

तर, ८६ बसगाड्यांच्या खरेदीसाठी निधी मिळाल्याने या बसगाड्या वर्षभरात उपलब्ध होणार आहेत तर, उर्वरित ९४ बसगाड्या पुढील दोन वर्षात उपलब्ध होतील. तसेच पीएम ई बस सेवा योजनेंतर्गत १०० वातानुकूलीत विद्युत बसगाड्या वर्षभरात टिएमटीच्या ताफ्यात दाखल होतील, असा दावा प्रशानसाने केला होता. मात्र, सप्टेंबर महिना उजाडला तरी या बसगाड्या टिएमटीच्या ताफ्यात दाखल होऊ शकलेल्या नाहीत.

हेही वाचा

विरार बोळींज आणि चितळसरमध्ये परवडणाऱ्या दरात दुकान खरेदीची संधी; म्हाडाच्या कोकण मंडळातील ७१ दुकानांचा ई लिलाव…

एकूण ४०३ विद्युत बसगाड्या

ठाणे महापालिका परिवहन उपक्रम हा ना नफा ना तोटा या तत्वावर चालविण्यात येतो. या उपक्रमाच्या ताफ्यात एकूण ४०० बसगाड्या आहेत. पैकी ३६० बसगाड्या प्रवासी सुविधेसाठी उपलब्ध होत आहेत. ठाणे शहराची लोकसंख्या २५ लाखांच्या घरात गेली आहे. प्रवाशी संख्येच्या तुलनेत या बसगाड्यांची संख्या अपुरी पडत आहे. यामुळे परिवहनच्या ताफ्यातील बसगाड्यांची संख्या वाढविण्यावर प्रशासनाकडून भर देण्यात येत आहे. त्याचबरोबर शहरातील पर्यावरणाचा समतोल राखला जावा यासाठी पर्यावरणपुरक विद्युत बसगाड्यांची खरेदी केली जात आहे. त्याचाच एक भाग म्हणून केंद्र आणि राज्य शासनाच्या १५ व्या वित्त आयोग तसेच पीएम ई बस सेवा योजनेंतर्गत पालिकेला एकूण ४०३ विद्युत बसगाड्या उपलब्ध होणार आहेत.

सप्टेंबर महिना उजाडला तरी

केंद्र शासनाच्या पीएम ई बस सेवा योजनेंतर्गत शंभर विद्युत वातानुकूलीत विद्युत बसगाड्या यंदाच्या वर्षभरात दाखल होणार होत्या. त्यात नऊ मीटरच्या ६० आणि १२ मीटरच्या ४० बसचा समावेश आहे. या बसगाड्या यंदा मार्च अखेरीपर्यंत ठाणे परिवहन सेवेत दाखल होणार होत्या. मात्र त्या अद्याप ताफ्यात दाखल होऊ शकलेल्या नाहीत. या बसगाड्यांपैकी २५ बसगाड्या ऑगस्ट महिनाअखेर दाखल होण्याची शक्यता वर्तविली जात होती. परंतु सप्टेंबर महिना उजाडला तरी या बसगाड्या टिएमटीच्या ताफ्यात दाखल होऊ शकलेल्या नाहीत.

प्रशासनाचे म्हणणे

या संदर्भात ठाणे परिवहन उपक्रमाचे व्यवस्थापक भालचंद्र बेहेरे यांच्याशी संपर्क साधला असता, त्यांनी केंद्र शासनाच्या पीएम ई बस सेवा योजनेंतर्गत विविध शहरांना देण्यात येणाऱ्या बसगाड्यांची नागपुर येथे तपासणी करण्यात आली होती. त्यात काही तांत्रिक त्रुटी आढळून आल्याने या बसगाड्या अद्याप मिळू शकलेल्या नाहीत. तांत्रिक अडचणी दूर करून महिनाभरात बसगाड्या दाखल होण्याची शक्यता आहे, असे त्यांनी स्पष्ट केले.