उल्हासनगरमध्ये ३ हजार ५७८ परवडणारी घरे उभारणार; प्रधानमंत्री आवास योजनेंतर्गत ७२३ कोटींचा भव्य गृहनिर्माण प्रकल्प

उल्हासनगरच्या कॅम्प चार आणि पाच या ठिकाणी हा प्रकल्प उभा राहणार आहे. यात एकूण ३ हजार ५७८ घरांचा समावेश आहे. हा आधुनिक गृहप्रकल्प असणार आहे.

A massive housing project of Rs 723 crore under the Pradhan Mantri Awas Yojana in ulhasnagar

प्रधानमंत्री आवास योजनेंतर्गत ७२३ कोटींचा भव्य गृहनिर्माण प्रकल्प (संग्रहित छायाचित्र)

उल्हासनगरः उल्हासनगर महानगरपालिकेने शहरातील आर्थिकदृष्ट्या दुर्बल घटकांना परवडणारी, सुरक्षित आणि दर्जेदार घरे उपलब्ध करून देण्यासाठी प्रधानमंत्री आवास योजनेअंतर्गत मोठा गृहनिर्माण प्रकल्प हाती घेतला आहे. या प्रकल्पासाठी तब्बल ३ हजार ५७८ घरांच्या उभारणीसाठी ७२३ कोटी ११ लाख रुपयांची निविदा जाहीर करण्यात आली आहे. उल्हासनगरच्या कॅम्प पाच येथील प्रेम नगर टेकडी येथे आणि कॅम्प चार येथील संतोष नगर येथे प्रत्येकी १ हजार ७८९ घरांची उभारणी केली जाणार आहे. या प्रकल्पामुळे शहरातील झोपडपट्टी, बैठ्या चाळी आणि दाटीवाटीच्या वस्त्यांमध्ये राहणाऱ्या नागरिकांना हक्काचे चांगले घर मिळू शकणार आहे.

उल्हासनगर शहरातील अनधिकृत बांधकामांच्या प्रश्नावर येत्या काळात कायमस्वरूपी तोडगा मिळू शकतो. मात्र उल्हासनगर आजही देशातील सर्वाधिक दाटीवाटीच्या शहरांपैकी एक शहर आहे. येथील एक चटईक्षेत्र निर्देशांकात सर्वाधिक लोकसंख्या वास्तव्यास आहे. त्यामुळे अनेक ठिकाणी झोपडपट्टी, बैठी घरे आहेत. परवडणाऱ्या घरांच्या माध्यमातून शहरात गृहप्रकल्प उभे राहावेत यासाठी स्थानिकांची मागणी होती. उल्हासनगर महापालिकेने त्यासाठी तयारी सुरू केली होती. खासदार डॉ. श्रीकांत शिंदे यांनी यासाठी पुढाकार घेतला. या पार्श्वभूमीवर, शहरातील कमी उत्पन्न गटातील नागरिकांसाठी घरांची वाढती मागणी लक्षात घेऊन प्रधानमंत्री आवास योजनेचा मोठा प्रकल्प उल्हासनगरसाठी हाती घेण्यात आला आहे.

उल्हासनगरच्या कॅम्प चार आणि पाच या ठिकाणी हा प्रकल्प उभा राहणार आहे. यात एकूण ३ हजार ५७८ घरांचा समावेश आहे. हा आधुनिक गृहप्रकल्प असणार आहे. नवीन गृहनिर्माण प्रकल्पात आधुनिक नागरी सुविधांसह सुरक्षित, स्वयंपूर्ण आणि नियोजित वसाहतींची उभारणी करण्यात येणार आहे. या उल्हासनगरच्या कॅम्प चार भागातील संतोष नगर परिसरात १ हजार ७८९ घरांची उभारणी केली जाईल. तर तितक्या घरांची उभारणी कॅम्प पाच भागातील प्रेम नगर टेकडी परिसरात केली जाणार आहे. एक किचन, बेडरूम आणि ह़ॉल अशी रचना असलेले हे घर असेल.

हेही वाचा

Thane illegal construction : ठाण्यात अनधिकृत बांधकामे रोखण्यासाठी ‘एआय’ची मदत; ठाणे महापालिकेचा निर्णय

प्रकल्पातील महत्त्वाच्या सुविधा

या प्रकल्पात पक्के काँक्रीट रस्ते, शासकीय निकषांनुसार पाणीपुरवठा व्यवस्था, मलनिस्सारण व जलनिस्सारण जाळे, सुव्यवस्थित वीजपुरवठा, समाजोपयोगी मूलभूत सुविधा, स्वयंपूर्ण वसाहतीसाठी आवश्यक अशा सर्व नागरी मूलभूत सेवा पुरवल्या जाणार आहेत.

उल्हासनगर महापालिकेने नुकतीच या प्रकल्पासाठी निविदा जाहीर केली आहे. ७२३ कोटी ११ लाख ३८ हजार रूपयांची ही निविदा नुकतीच जाहीर करण्यात आली आहे. कार्यादेश दिल्यानंतर ३ वर्षात हा प्रकल्प पूर्ण होणे अपेक्षित आहे. परवडणारी घरे या प्रवर्गातील ही घरे आर्थिकदृष्ट्या मागास वर्गातील नागरिकांसाठी फायदेशीर ठरतील.

या कामांसाठी निविदा

या प्रकल्पाच्या निविदेत उभारणीसह भूखंडांचे सर्वेक्षण, मातीची चाचणी, आराखडे-नकाशे, इमारतींची वास्तव उभारणी, तसेच अंतर्गत व बाह्य पायाभूत सुविधा तयार करण्याची जबाबदारी निविदा प्रक्रियेत निवडलेल्या कंत्राटदाराकडे सोपविण्यात येणार आहे.