कल्याण-शिळफाटा रस्त्यावर सलग सहाव्या दिवशी अभूतपूर्व वाहतूक कोंडी ; वाहनांच्या लांबलचक रांगा

कल्याण-शिळफाटा रस्त्यालगत काटई, कोळे, लोढा हेवन, पलावा वसाहतींमध्ये बालवर्गापासून ते कनिष्ठ महाविद्यालयापर्यंत शाळा आहेत. कल्याण, डोंबिवली, या भागातील नवीन वसाहतींमुळे मुले येथील शाळा, महाविद्यालयात दररोज शालेय बस, खासगी वाहनांनी येतात. त्यांना या कोंडीचा सर्वाधिक फटका बसत आहे. शाळेत आणि घरी विद्यार्थी वेळेत पोहचत नसल्याने पालक, शिक्षक नाराज आहेत. काही शाळा चालकांनी स्थानिक आमदार, रस्ते प्राधिकरणांना पत्रे लिहून शालेय बस मार्गातील खड्डे तात्काळ भरण्याची मागणी केली आहे.

पहाटे पाच ते रात्री दोन ते तीन वाजेपर्यंत वाहतूक कोंडीमुळे रस्त्यावर कर्तव्यावर राहावे लागत असल्याने वाहतूक पोलीस त्रस्त झाले आहेत. अपुरे वाहतूक पोलीस आणि त्या तुलनेत वाहनांचा भार अधिक असल्याने प्रत्येक चौक, मार्गात वाहतूक पोलीस तैनात करणे शक्य होत नाही. अनेक वाहन चालक रस्ता दुभाजक फुटल्याच्या तेथून घुसून वाहतूक कोंडीत भर घालत आहेत, अशी माहिती वाहतूक अधिकाऱ्यांनी दिली. शिळफाटा रस्त्यालगत अनेक पेट्रोल पंप आहेत. पंपाच्या दिशेने जाणारी आणि बाहेर पडणारी वाहने मार्गिका मिळत नसल्याने रस्त्यात आडवी येतात. त्यामुळे कोंडी होते.
मुख्यमंत्री एकनाथ शिंदे यांनी ठाणे जिल्ह्यातील सर्व रस्ते बांधकाम, नियंत्रण यंत्रणांना खड्डे बुजविण्याचे आदेश देऊनही या यंत्रणा तत्परतेने खड्डे बुजविण्याची कामे सुरू करत नसल्याने नागरिक आश्चर्य व्यक्त करत आहेत.