वेगवेगळे इफेक्ट्स, वेगवेगळे पोझ, हटके जागा शोधून स्वत:चे फोटो काढणं कुणाला आवडत नाही. त्यासाठी इतरांपेक्षा वेगळं असं फोटोशूट करण्याचा विचार प्रत्येकजण करत असते. त्यासाठी काहीही करायची तयारी अनेकांची असते. हटके आणि वेगळा प्रयोग करताना अनेकांना त्याची किंमतही मोजावी लागते. सध्या असाच एका फोटोशूटचा व्हिडीओ सोशल मीडियावर व्हायरल झाला आहे. फोटोशूटचा हटके प्रयोग त्या महिलेच्या जिवावर बेतला म्हटलं तर वावगं ठरणार नाही.

IFS अधिकारी सुशांत नंदा यांनी या महिलेच्या फोटोशूटचा व्हिडीओ ट्वीट केला आहे. या व्हिडीओत स्पष्ट दिसतेय की, एक महिला हत्तीच्या सोंडेवर बसून फोटोशूट करत आहे. पण या महिलेला हत्तीच्या सोंडेवर बसून फोटो काढण्याचा शौक चांगलाच महागात पडला. कारण हत्तीनं या महिलेला अगदी फुटबॉलसारखं फेकून दिलं आहे. त्या महिलेचं नशीब चांगलं होतं की हत्तीनं महिलेला पाण्यात फेकलं नाहीतर त्या महिलाचा जीव गेला असता.

सुशांत नंदा यांनी व्हिडीओ पोस्ट करताना भन्नाट असं कॅप्शनही दिलं आहे. या व्हिडीओमध्ये सगळ्यात सुंदर काय आहे महिला, हत्ती की घडलेला प्रसंग? असं कॅप्शन दिलं आहे. या व्हिडीओला नेटकऱ्यांनी चांगलीच पसंती दर्शवली आहे. या मजेशीर फोटोशूटचा व्हिडीओ सध्या सोशल मीडियावर तुफान व्हायरल झाला आहे.

या व्हिडीओला आतापर्यंत दहा हजारांपेक्षा जास्त जणांनी पाहिलं आहे.