सुंदर मुलीचा अपमान करायला गेला आणि ‘तो’ तोंडावर आदळला; तरुणीने भांड्याला साबण लावला अन्…

अनेकदा मुलींची ओळख ही किचनपर्यंतच मर्यादित राहावी यासाठी डार्क ह्युमरच्या नावाखाली अनेकजण तोंडाला येईल ते बोलतात. उदाहरण द्यायचं तर आता या कशफ अली क्रिएटरने आपल्या इंस्टाग्राम स्टोरीमध्ये ‘आस्क मी एनिथिंग’ अशी पोस्ट केली होती. तुम्हाला माहीतच असेल हे एक असे फीचर आहे ज्यावर तुमचे फॉलोवर्स रिप्लाय करून तुम्हाला प्रश्न विचारू शकतात किंवा कमेंट करू शकतात. तर या कशफच्या स्टोरीवर एका अतिहुशार व्यक्तीने तिला “जाऊन भांडी घास जा” असे सांगितले. यावर उत्तर देण्यासाठी कशफने एक खास व्हिडीओ बनवला आणि त्याच व्हिडिओमध्ये एक सणसणीत उत्तर सुद्धा दिले आहे.

विशेष म्हणजे अजिबात न चिडता आणि उगाच आव न आणता कशफने उत्तर देत म्हटले की, “घ्या, घासली मी भांडी, आता? ठीक आहे, सगळेच जेवतात, सगळेच भांडी घासतात. आता प्रत्येकवेळी जेवायला काय नवीन भांडी आपण विकत घेऊ शकत नाही ना, धुवून घासूनच घ्यावी लागतात. तुम्ही पण ना… भांडी घासल्याने काय मी लहान किंवा मोठी होते का? हे एक साधं काम आहे जे मी केलं, पण हे काम करायला सांगून तुम्ही महिलांचा किंवा कोणाचाही अपमान करताय असं तुम्हाला का वाटतं? निदान त्यासाठी तरी वेगळं काहीतरी बोलायला शिका”

हे ही वाचा<< रस्त्याच्या कडेला चुकूनही गाडी थांबवू नका, स्कुटी तर नाहीच! ‘हा’ क्षण पाहून अंगावर येईल काटा

कशफचा हा व्हिडीओ सोशल मीडियावर चांगलाच व्हायरल झाला आहे. तिच्या या खरमरीत उत्तराचे सगळेच कौतुक करत आहेत. भांडी घासणे, जेवण बनवणे, कपडे धुणे या प्रत्येकाच्या गरजा आहेत आणि त्या स्वतः पूर्ण करणे हे अभिमानाची गोष्ट आहे. हा अभिमान प्रत्येकाने बाळगायला हवा उलट दुसऱ्याला स्वतःचं काम करायला लावण्यात मोठेपणा नाही. अशा पद्धतीच्या पाठिंबा दर्शवणाऱ्या कमेंट्स या व्हायरल व्हिडीओवर येत आहेत.