महामार्गावरील उभ्या ट्रकला भरधाव कार धडकली, ६ जणांचा जागीच मृत्यू, थरारक अपघाताचा VIDEO व्हायरल

मिळालेल्या माहितीनुसार, तामिळनाडूतील येंगूर येथील एका कुटुंबातील आठ जण कारमधून पेरुनथुराईला निघाले होते. सेलम-इरोड महामार्गावर पहाटे ४ वाजता कार भरधाव वेगात जात होती. यावेळी ती महामार्गाच्या बाजूला उभ्या असलेल्या एका ट्रकला मागून धडकली. कारचा वेग एवढा होता ती थेट ट्रकच्या खाली घुसल्याच दिसत आहे. या अपघातामध्ये कारमधील आठ जणांपैकी सहा जणांचा जागीच मृत्यू झाला. मृतांमध्ये एका वर्षाच्या मुलाचाही समावेश आहे. तर या मुलाच्या आई आणि वडिलांचाही मृत्यू झाल्याचे सांगण्यात येत आहे.

हेही वाचा- धावत्या ट्रेनमधून पडल्याने एका व्यक्तीचा तुटला हात, तुटलेला हात घेऊन धावत रुग्णालयात गेला अन्…

तर कारमधील दोघेजण गंभीर जखमी झाले असून त्यांना जवळच्या रुग्णालयात दाखल करण्यात आले आहे. घटनेची माहिती मिळताच पोलीस दाखल झाले. त्यानंतर स्थानिक नागरिकांच्या मदतीने जखमींना तातडीने रुग्णालयात पाठवण्यात आले. मृतदेह पोस्टमॉर्टमसाठी पाठवण्यात आले असून कारचा चालक विघ्नेश आणि अन्य प्रवासी प्रिया यांना गंभीर दुखापत झाल्याने रुग्णालयात दाखल करण्यात आले आहे. हा अपघात कसा झाला हे अद्याप स्पष्ट झालेले नाही. मात्र चालकाला झोप लागल्याने हा अपघात झाल्याचा प्राथमिक अंदाज आहे. तसेच कारमध्ये यांत्रिक बिघाड झाल्याची शक्यताही वर्तवली जात आहे.