पोटच्या मुलापेक्षा फोन महत्त्वाचा! मोबाइलवर बोलता बोलता ९ महिन्याच्या बाळासह भल्योमोठ्या खड्ड्यात पडली, VIDEO पाहून काळजात भरेल धडकी

कामापुरता फोन वापरणं वेगळं आणि फोनचं व्यसन लागणं वेगळं. ज्यांना फोनचं व्यसन लागतं त्यांना आजूबाजूला नेमकं काय घडतंय हेदेखील कळत नाही. ते आपल्याच दुनियेत मग्न असतात. त्यांना जगाची जणू पर्वाच नसते. पण यासगळ्यात आपल्यासोबतच दुसऱ्याला तर त्रास होत नाही आहे ना हेदेखील बघणं तितकंच महत्त्वाचं आहे. याआधीही अनेकदा फोन बघत असल्याने अनेकांचे भयंकर अपघात झाले आहेत. सध्या असाच काहीसा प्रकार एका महिलेबरोबर आणि तिच्या ९ महिन्याच्या चिमुकल्याबरोबर घडला आहे. फोनवर बघता बघता असं काही झालं की ते पाहून, तुम्हालाही बसेल धक्का…

आई आणि बाळाबरोबर घडली दुर्घटना

सोशल मीडियावरील हा व्हिडीओ पाहून अनेकांच्या काळजाचा ठोकाच चुकला आहे. या व्हिडीओमध्ये एक महिला आपल्या ९ महिन्याच्या मुलाला घेऊन रस्त्यावरून चालताना दिसतेय. पण चालताना तिचं लक्ष रस्त्यावर नसून फोनमध्ये असतं. फोनवर बोलत असल्यामुळे रस्त्यावर असलेला भलामोठा गटाराचा खड्डा तिला दिसला नाही आणि चिमुकल्यासह ती त्या खड्ड्यात पडली. खड्ड्यात जोरात पडल्यामुळे चिमुकल्याचं डोक आपटतं आणि डोक्यालाही मार लागतो.

तिथे उपस्थित असणाऱ्या काहींना हा अपघात दिसला आणि तिच्या मदतीसाठी माणसं धावून गेली. एक माणूस त्या खड्ड्यातदेखील उतरला आणि त्याने आई आणि मुलाला बाहेर काढलं.

इन्स्टाग्रामवरील @explorewithdeepti या अकाउंटवरून महिलेचा आणि बाळाचा हा व्हिडीओ एका दिवसापूर्वी शेअर करण्यात आला असून याला १ लाखाच्यावर व्ह्युज आले आहेत. दरम्यान, ही घटना नेमकी कुठे घडली हे अद्याप कळू शकले नाही.

युजर्सच्या प्रतिक्रिया

सोशल मीडियावरील हा व्हिडओ पाहून अनेकांनी कमेंट सेक्शनमध्ये आपल्या प्रतिक्रिया दिल्या आहेत. एका युजरने कमेंट करत लिहिलं, “रस्त्यावर चालत असताना कधीही फोन वापरू नका.” तर दुसऱ्याने “थोडं मोबाईलवरून लक्ष वळवलं असतं तर खाली काय आहे ते दिसलं असतं.” अशी कमेंट केली. तर एकजण कमेंट करत म्हणाला, “फक्त एका फोनमुळे त्या मुलाच्या डोक्याला आपटलं, हे किती वेदनादायक आहे”