‘चौधरी’ गाण्यावर दोन लहानग्यांचा जबरदस्त डान्स; VIDEO पाहून नेटकरी करतायत कौतुक

सध्या समाजमाध्यमावर एक जबरदस्त व्हिडीओ व्हायरल होत आहे, त्यामध्ये दोन लहान मुलांनी आपल्या नृत्यानं प्रेक्षकांची मनं जिंकली आहेत. मामे खान यांच्या लोकप्रिय ‘चौधरी’ गाण्यावर थिरकणाऱ्या या मुलांनी आपल्या उत्साह, आत्मविश्वास व भन्नाट अदाकारीने खळबळ निर्माण केली आहे. या दोन लहानग्यांचा हा व्हिडीओ केवळ काही मिनिटांचा असला तरी त्यामध्ये त्यांनी मंचावर जी ऊर्जा दाखवली आहे, ती अनेकांना थक्क करणारी ठरली आहे.

या व्हिडीओमध्ये दोघांचेही कोरिओग्राफीसोबतच फेस एक्स्प्रेशन्स आणि टायमिंग अतिशय प्रोफेशनल दिसते. त्यांची हसतमुख आणि आत्मविश्वासाने भरलेली मुद्रा प्रेक्षकांच्या थेट हृदयात घर करते. इतक्या लहान वयातही त्यांनी जे कौशल्य दाखवलं आहे, ते खरंच वाखाणण्याजोगं आहे. यावेळी दोघांच्या चेहऱ्यावरील हावभाव आणि डान्स स्टेप्सही अनेकांचे लक्ष वेधून घेत आहेत. ही दोन लहान मुलं आपल्या उत्साहात आणि आत्मविश्वासानं नाचताना दिसत आहेत. त्यांच्या जबरदस्त डान्स स्टेप्स आणि चेहऱ्यावरचे गोड हावभाव पाहून नेटकरीही थक्क झाले आहेत आणि त्यांचं भरभरून कौतुक करीत आहेत. या व्हिडीओला आतापर्यंत एक कोटीहून अधिक व्ह्युज मिळाले असून, नेटकरी त्यांच्या डान्सचं प्रचंड कौतुक करीत आहेत.

त्विशा भारती हिनं हा व्हिडीओ तिच्या इन्स्टाग्राम अकाउंटवरून शेअर केला आहे. डान्स करताना तिची आणि नाइशची तालमेल इतकी जबरदस्त आहे, की प्रेक्षक अक्षरशः थिरकायला लागतात. या दोघांच्या मागे उभी असलेली व्यक्ती म्हणजे त्यांचा कोरिओग्राफर नोएल अलेक्झांडर, ज्याचा अभिमान त्यांच्या चेहऱ्यावर स्पष्ट दिसतो. परफॉर्मन्सदरम्यान त्याच्या चेहऱ्यावर उमटणारं हसू आणि नजरेत दिसणारं कौतुक पाहून हे स्पष्ट होतं की, त्यानं आपल्या विद्यार्थ्यांवर किती मेहनत घेतली आहे.

येथे पाहा व्हिडीओ

व्हिडीओच्या कमेंट सेक्शनमध्ये लोकांनी “तुमच्या डान्सनं अंगावर शहारे आले”, “इतका सुंदर डान्स मी फार कमी पाहिलाय”, “नोएल सरांचं गोड हसणं आणि मुलांचा आत्मविश्वास परफेक्ट टीम”, अशा प्रतिक्रिया दिल्या आहेत. या लहान कलाकारांनी हे दाखवून दिलं आहे की, वय लहान असलं तरी टॅलेंट मोठं असू शकतं.