भाजप नगरसेवकाचे शिवसेना आमदार प्रताप सरनाईकांवर गंभीर आरोप, व्हिडिओ प्रसार माध्यमांवर व्हायरल

भाईंदर : पाच वर्षांपूर्वी भाजपमध्ये प्रवेश केल्यामुळे आमदार प्रताप सरनाईक आपल्या हॉटेल व्यवसायाला त्रास देत असल्याचे आरोप भाजपच्या एका माजी नगरसेवकाने केले आहेत. याबाबतची चित्रफीत समाज माध्यमांवर जलद गतीने व्हायरल झाली आहे. अरविंद शेट्टी असे या माजी भाजप नगरसेवकाचे नाव आहे. शेट्टी यांचा प्रामुख्याने शहरात हॉटेलचा व्यवसाय आहे. २०१७ साली झालेल्या महापालिका निवडणुकीत भाजपमध्ये प्रवेश करून निवडून आल्यानंतर आमदार प्रताप सरनाईक आपल्याला त्रास देत असल्याचा आरोप शेट्टी यांनी केला आहे. यापूर्वी सरनाईक यांनी महापालिकेवर दबाव टाकून आपले २० वर्ष जुने हॉटेल तोडले होते. तर अनेक वेळा सार्वजनिकरित्या शिवीगाळ केल्याचे त्यांचे म्हणणे आहे. याशिवाय आता घोडबंदर मार्गांवर असलेल्या हॉटेलच्या प्रवेशद्वारावर सरनाईक पालिकेमार्फत भिंत उभारत असल्याचे त्यांनी आरोप केले आहे.