नागपूर विभागासाठी ७२७ कोटींचा प्रारूप नियोजन आराखडा

नागपूर जिल्ह्य़ासाठी २०१४-१५ वर्षांसाठी दोनशे कोटी रुपयांसह नागपूर विभागातील सहाही जिल्ह्य़ांसाठी एकूण ७२७ कोटी रुपयांच्या प्रारूप नियोजन आराखडय़ास मंजुरी देण्यात आल्याचे उपमुख्यमंत्री अजित पवार यांनी शनिवारी पत्रकार परिषदेत सांगितले. या वर्षांत दोन निवडणुका असल्याने चार महिने आचारसंहितेत जातील. त्यामुळे आठ महिन्यात हा निधी खर्च करावा लागणार आहे.  
नियोजन आराखडा तयार करण्यासाठी नागपूर विभागाची बैठक झाली. वित्त व नियोजन राज्यमंत्री राजेंद्र मुळक (वर्धा), शिवाजीराव मोघे (नागपूर), अनिल देशमुख (गोंदिया), संजय देवतळे (चंद्रपूर), रणजित कांबळे (भंडारा) हे पालकमंत्री, वित्त विभागाचे अतिरिक्त मुख्य सचिव (नियोजन) के.पी. बक्षी, सचिव जे.पी. गुप्ता, विभागीय आयुक्त वेणुगोपाल रेड्डी यांच्यासह जिल्हाधिकारी, मुख्य कार्यपालन अधिकारी उपस्थित होते. २०१३-१४ या वर्षांत नागपूर जिल्ह्य़ासाठी दोनशे, चंद्रपूर दीडशे, गडचिरोली ११७, वर्धा ९५, भंडारा ८०, गोंदिया जिल्हा ८५, असे एकूण ७२७ कोटी रुपयांच्या प्रारूप आराखडय़ास मंजुरी देण्यात आली. यामध्ये गेल्यावर्षीच्या तुलनेत ७८ कोटी रुपयांची वाढ करण्यात आली आहे.
नागपूर, चंद्रपूर, गोंदिया, वर्धा व गडचिरोली या जिल्ह्य़ांत जिल्हा नियोजन भवन बांधले जाणार आहेत. जिल्हास्तरावर लोकप्रतिनिधी, अधिकाऱ्यांच्या वारंवार बैठकी घेतल्या जातात, त्यासाठी जिल्हा नियोजन भवनात अद्ययावत सभागृह राहील. जिल्हा वार्षिक योजनेतून जिल्हा परिषदेच्या शाळा, आरोग्य उपकेंद्र, औद्योगिक प्रशिक्षण केंद्र, अंगणवाडय़ा आदींचे बांधकाम यासाठी मानव विकास निधी व आदिवासी उपयोजनांमधून प्रत्येकी साडेचार टक्के निधी वाढवून देण्यात येत आहे.
सामूहिक व सामाजिक विकासकामांना प्राधान्य, वन्यप्राण्यांमुळे होणारे नुकसान टाळण्यासाठी शेतीला सौर कुंपण, कृषी व संलग्न बाबींवर भर, गोंदिया वैद्यकीय महाविद्यालयासाठी जागेचे अधिग्रहण, सर्वशिक्षा अभियानाच्या निधीतून शाळांचे बांधकाम यावर भर दिला जाणार आहे.
गडचिरोली जिल्ह्य़ात बँकिंग जाळे वाढविण्यासाठी गडचिरोली जिल्हा मध्यवर्ती सहकारी बँकेला नवीन शाखा काढण्यासाठी विशेष आर्थिक मदत दिली जाईल. गडचिरोली जिल्ह्य़ात एसटीचे जाळे कमी असल्याने ग्रामीण विद्यार्थ्यांना प्रवासासाठी तीन कोटी रुपये बस खरेदीसाठी उपलब्ध करून देण्यात आले असून ग्रामीण भागात स्वस्त धान्य वाहतुकीसाठी त्यांचा वापर केला जाईल.