अकोला जिल्ह्य़ातील काटेपूर्णाचे १० दरवाजे उघडले

* चार धरणांच्या पातळीत वाढ
* दगडपारवा व मोर्णा निम्मेही नाही
गेल्या २४ तासात अकोला जिल्ह्य़ात जोरदार पाऊस झाला. त्यामुळे जिल्ह्य़ातील ६ पैकी ४ धरणातील जलसाठा ८० टक्क्यांवर गेला आहे. पंधरा दिवसापूर्वी निर्गुणा व उमा या दोन्ही धरणातील जलसाठा बराच कमी होता. पण, या १५ दिवसात झालेल्या संततधार पावसामुळे ही दोन्ही धरणे भरली आहेत. निर्गुणा धरणात ८८ टक्के जलसाठा झाला असून उमा धरणात ८० टक्के साठा आहे. काटेपूर्णा धरणात जलसाठा खूप वाढल्याने या धरणाचे १० दरवाजे उघडण्यात आले आहेत. वान धरणाचे ४, तर पोपटखेड धरणाचा १ दरवाजा यापूर्वीच उघडण्यात आला आहे. काटेपूर्णा ८१.३२, मोर्णा ४४.९५, निर्गुणा ८८, उमा ८०, दगडपारवा ३९, तर वान ८१.५५ टक्के भरले आहेत.
गेल्या २४ तासात अकोला ३२, बार्शिटाकळी ४५, अकोट ४०, तेल्हारा ४४, बाळापूर ३४, पातूर ३०, तर मूर्तीजापूर येथे ३० मि.मी. पाऊस पडला. तेल्हारा तालुक्यात दिवसभरात ४४ मि.मी. पाऊस झाल्याने आता पावसाच्या सरासरीत पातूरला पुन्हा मागे टाकले आहे. आतापर्यंत झालेल्या पावसाची आकडेवारी पुढीलप्रमाणे आहे. अकोला ४६८, बार्शिटाकळी ४८०.४०, अकोट ४०८.८४, तेल्हारा सर्वाधिक ६०३.१०, बाळापूर ४०८.७१, पातूर ५९७.१३ व मूर्तीजापूर ४६३.३० मि.मी. पाऊस झाला आहे. या संततधार पावसामुळे मात्र पीक स्थिती खराब होत चालली असून ओल्या दुष्काळाची स्थिती आहे. शेतात बऱ्याच ठिकाणी पाणी साचले असल्याचे दृश्य आहे. धरणातील पाण्याच्या पातळीत वाढ झाल्याने बुधवारी शहरातून वाहणाऱ्या मोर्णा नदीचे पात्रही फुगले होते. बुधवारी मात्र अगरवेसनजीकच्या पुलाच्या काही फूट खाली पाणी वाहत होते. दोन दिवस जर असाच पाऊस राहिल्यास मोर्णेला एखादा पूर येऊ शकेल. सर्व जिल्ह्य़ात जोरदार पाऊस झाल्याने हजारो हेक्टर शेतावरील पिके नष्ट झाली आहेत. त्यामुळे कित्येक शेतकऱ्यांवर पुन्हा संकट कोसळले आहे.